Меркел Германиянинг мигрантлар интеграциясидаги муваффақиятига ишоняпти

10 йил ичида Германия муҳожирларни интеграция қилиш масаласида кўп нарсага эришди, деди собиқ канцлер. 2015 йилда Ангела Меркел ўн минглаб қочқинларни Германияга киритишни буюриб, «биз буни уддалай оламиз», деб айтганди.

Фото: Getty Images

Германия муҳожирларни интеграциялашда сезиларли ютуқларга эришди. Бу фикрни Германиянинг собиқ канцлери Ангела Меркел ARD давлат медиа компанияси ҳужжатли филми учун ёзиб олинган журналист Инго Цамперони билан суҳбатда билдирди. Собиқ ҳукумат раҳбари билан суҳбатдан парчалар 25 август куни чоп этилди.

«Бу (интеграция) - жараён. Лекин биз ҳозиргача кўп нарсага эришдик. Ва ҳали қилиниши керак бўлган ишлар давом этиши керак», — деди Меркел.

2015 йилнинг ёзида ўн минглаб қочқинлар Германияга «Болқон йўли» орқали кириб келган. Германияга кетаётган муҳожирларнинг умумий сони бир неча юз минг кишига етди. Меркел, ўша пайтдаги канцлер, «биз буни уддалай оламиз» (Wir schaffen das) деб эълон қилиб, аксарияти Суриядан бўлган янги келганларни киритишга рухсат беришни буюрди.