Абу Райҳон Беруний университетининг лицензиясида муаммо йўқлиги маълум бўлди. Вазирлик судда ютқазган

Kun.uz'нинг Олий таълим вазирлиги 5 та хусусий университетнинг қўшимча лицензиясини хатога чиқаргани ҳақидаги хабарида Абу Райҳон Беруний университетининг лицензияси билан боғлиқ ҳолат эсга олинганди. Маълум бўлишича, вазирликнинг ушбу ОТМ лицензиясини бекор қилиш юзасидан киритган аризаси судда рад этилган.

Фото: Абу Райҳон Беруний университети

29 август куни 5 та хусусий университет фаолиятини кенгайтиришга лицензия олди, лекин Олий таълим вазирлиги бунга “Лицензия” ахборот тизимидаги техник носозлик сабаб бўлганини айтиб чиқди. Адлия вазирлиги носозлик бўлганини рад этди.

Kun.uz бу ҳақда берган хабарида Абу Райҳон Беруний университети билан боғлиқ бир йил аввалги ҳолатни эслаганди. Олий таълим вазирлиги ушбу университетнинг лицензияси ҳам “техник носозлик сабабли хато берилган” деган важ билан уни бекор қилиш ҳақида судга ариза киритган, лекин ютқазган.

Маълум бўлишича, Олий таълим, фан ва инновациялар вазирлиги иқтисодий судга ариза билан мурожаат қилиб, жавобгар “Abu Rayhon Beruniy Universiteti” НТМга 2024 йил 21 август санасида нодавлат таълим хизматларини кўрсатиш учун берилган 363695-сонли лицензиясини бекор қилишни сўраган.

Тошкент туманлараро иқтисодий судининг 2024 йил 19 ноябрдаги ҳал қилув қарори билан аризани қаноатлантириш рад этилган. Шундан сўнг бу иш юқори инстанцияларда қайта кўрилмаган.

Айни пайтда Абу Райҳон Беруний университетининг лицензияси фаол бўлиб турибди. Уни ушбу ҳавола орқали кўриш мумкин.

Тайёрлаган: Дилшод Абдуқодиров

#ОТМ #Абу Райҳон Беруний университети