5 сентябр, жума куни 58 ёшида адвокат Елена Липцер вафот этди. Липцер ўғлининг рафиқасига кўра, ўлимга узоқ давом этган касаллик сабаб бўлган.
Елена Липцер ҳуқуқ ҳимоячиси Лев Пономаревнинг қизи. У 2001 йилда адвокатлик фаолиятини бошлаган, Россия Федерацияси Конституциявий судида ишлаган, у ерда аризачиларнинг, шу жумладан Чернобил ногиронларининг манфаатларини ҳимоя қилган. 2003 йилда Елена ЮКОС нефт компанияси ишида "Менатеп" банкининг собиқ раҳбари Платон Лебедевнинг адвокатлари жамоасига қўшилди. 2011 йилда Елена Липцер «Россиядаги 100 энг нуфузли аёл» рейтингига киритилган.
Елена Липцер мухолифатчи сиёсатчи Алексей Навалнийнинг адвокатларидан бири бўлган Алексей Липцернинг онаси. 2025 йил январ ойида суд Алексейни «экстремистик ҳамжамият»да иштирок этгани учун беш йилга озодликдан маҳрум қилди.
