Германия ҳукумати қочқинларнинг Сурияга қайтишини рағбатлантирмоқчи

Германиядаги ҳукмрон коалицияга кирувчи Христиан-демократик иттифоқ (ХДИ) сиёсатчилари суриялик қочқинларни ватанига қайтариш учун янада самаралироқ рағбатлантиришни талаб қилмоқда. «Германияда қолиш учун иқтисодий имтиёзлар сурияликларнинг ўз мамлакатини қайта қуришда иштирок этиш манфаатларидан ошмаслиги керак», деди Бундестаг разведка қўмитаси раҳбари ва ХДИ вакили Марк Хенрихман 8 сентябр, душанба куни Bild таблоидига.

Унинг таъкидлашича, Германияда қолиш ёки Сурияга қайтиш қарори иқтисодий сабабларга кўра қабул қилинмаслиги керак. «Биз бу мамлакатдаги вазиятни барқарорлаштиришга ёрдам беришимиз, қайта қуришни рағбатлантиришимиз ва хавфсизлик масалаларида ҳамкорлик қилишимиз керак», деди Хенрихман. Унинг сўзларига кўра, Германия сурияликларнинг ватанига ўз ихтиёри билан кетишини таъминлашга ҳаракат қилиши керак, бироқ Сурияда бунинг учун зарур шарт-шароитлар мавжудлиги таъминланиши лозим.

Ўз навбатида, ХДИ/ХСИ фракцияси спикери, христиан-демократлар партиясининг ички сиёсат бўйича эксперти Александр Тром сурияликларнинг ўз юртини тарк этишига асл сабаб Башар Асад режимининг террори бўлганини, ҳозир эса бу террорга барҳам берилганини эслатди. «Шунинг учун Сурия фуқаролари ўз ватанига қайтиб, уни қайта тиклашда иштирок этишини кутиш керак», — деди у Bild нашрига берган интервюсида.