Мерц: Украина - Путиннинг забт этиш режаларининг «фақат бошланиши»

Москва тинчликнинг Европа архитектурасини шафқатсизларча вайрон қилди, шунинг учун энди вазифа бир неча ўн йиллар давом этиши керак бўлган янги хавфсизлик тизимини қуришдир, деди Германия канцлери Мерц.

Фото: Soeren Stache/dpa/picture alliance

Россия президенти Владимир Путиннинг «империалистик режаси» Украинани забт этиш билан тугамайди, бу «фақат бошланиши», деб ҳисоблайди Германия канцлери Фридрих Мерц. «Биз ҳар куни тобора кучайиб бораётган Россия ҳужумларига, жумладан, инфратузилмага қарши ҳужумларга дуч келяпмиз», деди у Берлиндаги ТИВда Германия элчиларининг тўрт кунлик конференциясини очар экан.

Шу билан бирга, Германия ҳукумати раҳбари «Москванинг Шимолий ва Болтиқ денгизларидаги провокациялари», шунингдек, Россиянинг Киевга ҳужуми, Европа Иттифоқи ваколатхонаси биносига зарар етказганига ишора қилди. Бу Москванинг «қоидаларга асосланган тартибни, тинчликнинг Европа архитектурасини» «энг шафқатсизларча» йўқ қилганини кўрсатади.

Унинг сўзларига кўра, Германия олдида «бир неча ўн йиллар давом этиши керак бўлган янги хавфсизлик архитектурасини қуриш» бўйича «тарихий вазифалар турибди». «Биз либерал дунё тартиби деб атайдиган нарса кўп томондан, шу жумладан сиёсий Ғарбда ҳам босим остида», деб тушунтирди Мерц. У «либерал демократиялар ва автократиялар ўқи ўртасидаги янги зиддият» ҳақида маълум қилди.