Трамп украиналик қочқин аёл қотилига ўлим жазоси тайинланиши кераклигини айтди

АҚШ президенти Доналд Трамп Шимолий Каролина штатида пичоқланган украиналик қочқин Ирина Заруцкая қотилини «ҳайвон» деб атади ва «зудлик» билан ўлим жазосига ҳукм қилиниши кераклигини таъкилади.

«Тинчлик ва омонлик излаб Америкага келган украиналик гўзал қизни бунчалик ваҳшийларча ўлдирган ҳайвоннинг [ишини] тезкор [ҳал] қилиш керак (бунга шубҳа йўқ!). Суд жараёни ва фақат ўлим жазоси тайинланиши лозим. Бошқа вариант бўлиши мумкин эмас!!!», деб ёзди Оқ уй раҳбари ижтимоий тармоқда.

The New York Post (NYP) газетасининг ёзишича, Қўшма Штатларнинг Шарлотт шаҳрида «профессионал рецидивист», 34 ёшли кенжа Декарлос Браун 23 ёшли украиналик қочқин Ирина Заруцкаяни пичоқлаб ўлдирган. Қотиллик жамоат транспортида содир бўлган, гумонланувчи уйсиз. Қотиллик тасвирланган видео ижтимоий тармоқларда тарқалиб, кенг муҳокамаларга сабаб бўлди.

Шундан сўнг, Трамп аёлнинг ўлимида АҚШ Демократик партиясини айблади, чунки унинг аъзолари «ёмон одамларни қамоққа олишдан бош тортади».

«[Қотил] таниқли профессионал жиноятчи бўлиб, январ ойида 14 марта ҳибсга олинган ва нақд пулсиз гаров эвазига қўйиб юборилган. [Нега] поездда, кўчаларда сайр қилиб юрибди? Бундай жиноятчиларни панжара ортига тиқиш керак», деб ёзган эди Трамп.

NYP газетасининг ёзишича, Браун 2011 йилдан бери «кўп марта» ҳибсга олинган, хусусан, ўғирлик, хавфли қуроллардан фойдаланган ҳолда талончилик ва таҳдидларни тарқатган.

АҚШ республикачилари ва демократлари жазо ва жиноий таъқиб сиёсати, шунингдек, одил судлов ва жиноятчилар мақомини ислоҳ қилиш бўйича кескин баҳс-мунозаралар олиб бормоқда. Республикачилар анъанавий равишда жазони кучайтириш риторикасига таянади, демократлар эса жазоларни инсонпарварлаштиришни талаб қилади.

2024 йил декабр ойида Трамп «шафқатсиз зўравонлар, қотиллар ва йиртқич ҳайвонлар учун ўлим жазосини қатъий талаб қилишга» ваъда берган эди. Унинг таъкидлашича, бу йўл билан АҚШ «қонун ва тартиб-интизом мамлакатига» айланади.