ЕИ суди россиялик миллиардер Пумпянскийга нисбатан санкцияларни бекор қилди

Люксембург суди россиялик миллиардер Дмитрий Пумпянскийга нисбатан амалдаги санкцияларни 2025 йил 15 сентябргача узайтириш ҳақидаги қарорни бекор қилди.

Фото: AP

Европа Иттифоқининг Люксембург суди Екатеринбургда яшовчи россиялик миллиардер Дмитрий Пумпянскийга нисбатан Европа санкцияларини бекор қилишга қарор қилди. Судялар ЕИ кенгашининг 2025 йил 14 мартдаги "Синара" гуруҳи ва Қувур металлургия компаниясининг собиқ эгасига нисбатан 2025 йил 15 сентябргача амалда бўлган чеклов чораларини узайтириш тўғрисидаги қарорини бекор қилди.

Суд, шунингдек, ЕИ кенгашига суд жараёнида Пумпянский сарфлаган харажатларни қоплаб беришни буюрди.

Шу куни ЕИ суди «Яндекс»нинг собиқ бош директори Тигран Худавердяннинг даъвосини қисман қаноатлантириб, Европа санкцияларини 2024 йил сентябридан 2025 йил мартигача узайтириш тўғрисидаги қарорни бекор қилди. Шу билан бирга, тадбиркор Европа Иттифоқининг чекловлар рўйхатида қолмоқда, чунки унга нисбатан санкцияларнинг охирги узайтирилиши бекор қилинмаган.

Тайёрлаган: Отабек Матназаров

#Европа Иттифоқи #Дмитрий Пумпянский