Трамп Европанинг Россияга қарши санкцияларини етарлича қаттиқ эмас деб атади

АҚШ президенти Европа ҳам АҚШ ҳаракатларига мувофиқ чекловларни кучайтириши шарти билан Москвага қарши санкцияларни кучайтиришга тайёрлигини билдирди. Хусусан, Трамп европаликлар Россиядан нефт сотиб олаётганидан норози.

Фото: AP / Alex Brandon

14 сентябр, якшанба куни журналистлар билан суҳбатда АҚШ президенти Доналд Трамп Европа ҳам ўз чекловларини Вашингтон ҳаракатларига мос равишда кучайтириш шарти билан Россияга нисбатан АҚШ санкцияларини кучайтиришга тайёрлигини маълум қилди.

«Европа Россиядан нефт сотиб олмоқда. Мен улар нефт сотиб олишини хоҳламайман», — дея Оқ уй раҳбарининг сўзларини келтиради Reuters. «Ва... улар киритаётган санкциялар унчалик қаттиқ эмас. Мен санкциялар қўлламоқчиман, лекин улар мен қилаётган ишимга мос равишда санкцияларни кучайтириши керак бўлади».

Бир кун аввал Доналд Трамп ўзининг Truth Social ижтимоий тармоғида мактубини эълон қилди ва унда «НАТОнинг барча давлатлари бунга рози бўлиб, худди шундай йўл тутишга киришса ҳамда НАТОнинг барча давлатлари Россиядан нефт сотиб олишни тўхтатса, Россияга нисбатан жиддий санкциялар қўллашга тайёрлиги» ҳақида ёзилган. Америка президенти Шимолий Атлантика алянсининг баъзи аъзоларининг Россия нефтини сотиб олишини «ҳайратланарли» деб атади ва бу НАТОнинг музокаралардаги позицияси ва алянснинг Москвага таъсирини заифлаштиришини қўшимча қилди.