Трамп Си Жинпинг билан Жанубий Кореяда учрашишини маълум қилди

АҚШ президенти Доналд Трамп 31 октябрдан 1 ноябргача Жанубий Кореяда бўлиб ўтадиган Осиё-Тинч океани иқтисодий ҳамкорлиги саммитида ХХР раиси Си Жинпинг билан учрашишини маълум қилди. Оқ уй раҳбари 19 сентябр, жума куни Си Жинпинг билан суҳбатдан сўнг Truth Social ижтимоий медиа платформасида тегишли хабарни жойлаштирди.

«Биз кўплаб жуда муҳим масалаларда, жумладан, савдо, фентанил, Россия ва Украина ўртасидаги урушни тугатиш зарурати ҳамда TikTok битимини маъқуллаш бўйича муваффақиятга эришдик», — деб ёзган Трамп.

У, шунингдек, Си билан 2026 йил бошида Хитойга ташриф буюришга келишиб олганини айтди. Си, ўз навбатида, АҚШга келади, деди Трамп. Саналар кейинроқ аниқлаштирилади. «TikTok келишуви маъқуллангани учун миннатдормиз ва иккаламиз ҳам сизни APEC саммитида кўришни орзиқиб кутяпмиз!» - дея қўшимча қилди Америка раҳбари.