Германия касалхоналари Россия билан уруш ҳолатида кунига 1000 нафар ярадорни қабул қилади

Германия қуролли кучлари (Бундесвер) НАТО ва Россия ўртасида кенг кўламли можаро юзага келган тақдирда тиббий ёрдам кўрсатиш режасини ишлаб чиқмоқда. Мамлакат ҳоспиталлари кунига 1000 га яқин яраланган аскарни даволашга тайёрланмоқда, деди Бундесвер марказий тиббий хизмати раҳбари Ралф Хоффман 22 сентябр, душанба куни чоп этилган Reuters агентлигига берган интервюсида. Унга кўра, кунлик касалхонага ётқизилганлар сони жанглар шиддати ва иштирок этадиган ҳарбий қисмлар ва бўлинмаларга боғлиқ бўлади.

Агентлик маълумотларига кўра, Европа қуролли кучлари 2022 йилда Россиянинг Украинага кенг кўламли бостириб кириши ортидан Москва билан юзага келиши мумкин бўлган можарога тайёргарликни тезлаштирган. Германия ҳам Украинадаги уруш тажрибасини ҳисобга олган ҳолда ҳарбий тиббиёт ходимларини тайёрлашни доимий равишда такомиллаштирмоқда. «Украинадаги урушнинг характери кескин ўзгарди», деб таъкидлади генерал Хоффман ўқ жароҳатларидан портлаш ва учувчисиз учоқлар ҳамда ўқ-дорилар туфайли куйиш жароҳатлари кўпайишига ишора қилиб. Унинг қўшимча қилишича, украиналиклар кўпинча ярадор аскарларни учувчисиз учоқлар туфайли тезда эвакуация қила олмайди, бу эса уларнинг аҳволини бевосита фронтда узоқ вақт барқарорлаштиришни талаб қилади.

Ярадорларни ташиш учун немис ҳарбийлари касалхона поездлари ва автобусларидан фойдаланишни, шунингдек, ҳаво тиббий эвакуациясини кенгайтиришни кўриб чиқмоқда. Ярадорларга биринчи ёрдам фронтда кўрсатилади, сўнгра Германияга, биринчи навбатда фуқаролик шифохоналарида даволаниш учун олиб кетилади. Хоффманнинг ҳисоб-китобларига кўра, Германиянинг умумий сиғими 440 000 минг кишилик касалхоналарида тахминан 15 000 ўрин керак бўлади. Ҳозирда тахминан 15 000 нафар кишига эга Бундесвернинг Марказий тиббий хизмати келажакдаги эҳтиёжларни қондириш учун кенгайтирилади, дея қўшимча қилди у.