Қўшимча функционаллар
-
Тунги кўриниш
Тошкент метросидаги Чилонзор линиясида поезднинг техник носозлиги сабаб интерваллар чўзилди
Носозлик “Ҳамид Олимжон” – “Пушкин” бекатлари оралиғида метро поездининг электр энергиясини қабул қилиш қисмида бўлган. 6 дақиқалик узилишда Чилонзор линиясидаги бошқа бекатларда интерваллар 10 дақиқагача узайган. Расмийларга кўра, бу ҳаракат таркибидан 48 йилдан бери фойдаланилади. Анча аввалроқ метрополитендаги мавжуд поездларнинг 75 фоизи хизмат муддатини ўтаб бўлгани айтилганди.
Фото: Видеодан кадр
Kun.uz’га пойтахт метросидаги айрим бекатлардан поездлар ҳаракатида узилиш юзага келиб, интерваллар 10 дақиқагача узайгани ҳақида мурожаат келиб тушди.
Тошкент метрополитенининг расмий муносабатига кўра, ҳолат шу йилнинг 24 сентябр санаси соат 15:31 лар атрофида “Ҳамид Олимжон” – “Пушкин” бекатлари оралиғида ҳаракатланаётган 6-сонли ҳаракат таркиби билан содир бўлган. Поезднинг электр энергиясини қабул қилиш қисмида техник носозлик кузатилган.
“Шу сабабли ушбу поезд 6 дақиқа тўхтаб қолган. Мавжуд носозлик ҳолати бартараф этилганидан сўнг поездлар ҳаракати қайта тикланди. Ҳозирги вақтда йўналишдаги поездлар белгиланган жадвал асосида ҳаракатланмоқда. Келтирилган ноқулайлик юзасидан йўловчилардан узр сўраймиз”, – дейилади хабарда.
Расмийларнинг Kun.uzʼга тасдиқлашича, айни вазият сабаб Чилонзор линиясидаги бошқа бекатларда поездлар интервали узайиб кетгани рост. Бу носозлик аниқланган ҳаракат таркиби эски бўлгани билан изоҳланмоқда. Маълумотларга кўра, ундан метрополитен 48 йилдан бери фойдаланиб келади.
Эслатиб ўтамиз, 2023 йилда “Тошкент метрополитени” вакиллари пойтахт метро вагонларининг ярмидан кўпи фойдаланиш муддатини ўтаб бўлганини маълум қилганди. Ўшанда 256 та вагон мавжуд экани, шунинг 75 фоизи 80-89 йилларда ишлаб чиқарилгани айтилганди.
