7 миллиард доллар ўғирлаган «аср фирибгари» айбини тан олди

Буюк Британияда фирибгарлик бўйича тарихдаги энг йирик терговлардан бири якунланмоқда. Биткоинларни ювишда гумон қилинаётган 47 ёшли хитойлик аёл Чжимин Цян 29 сентябр куни Лондон судида ўз айбини тан олди, деб хабар берди Euronews.

Британия полицияси ундан 7 миллиард долларга яқин рекорд миқдордаги криптовалютани олиб қўйганидан кейин аёл суд олдида жавоб берди. Бу дунёдаги энг йирик мусодара, деб маълум қилди Скотленд-Ярд.

Цяннинг айбини тан олиши Британия ҳуқуқ-тартибот идоралари хитойлик ҳамкасблари билан ҳамкорликда олиб борган глобал пул ювиш схемаси бўйича қарийб етти йиллик терговнинг чўққиси бўлди. Уларнинг маълумотларига кўра, Чжимин Цян 2014-2017 йилларда Хитойда йирик фирибгарлик кампаниясини уюштириб, ўзига тегишли Tianjin Lantian Gerui Electronic Technology компаниясининг 128 мингдан ортиқ омонатчисини чув туширган. У қурбонларга 300 фоиз даромад ваъда қилган ва улардан ўғирланган маблағларни биткоинларга ўтказган.

Кейин Цян Хитойни тарк этиб, Буюк Британияга кўчиб ўтди ва у ерда элита кўчмас мулкини сотиб олди. Ўтган йили иш доирасида унинг шериги 6 йил қамоқ жазосига ҳукм қилинган, Цяннинг ўзига яқин орада ҳукм чиқарилади.

Таъкидланишича, энди фирибгар аёлдан мусодара қилинган маблағларнинг келажаги ҳақидаги баҳслар кучаймоқда. Буюк Британия мусодара қилинган активларни бюджет тақчиллигини қоплаш учун сақлаб қолмоқчи, аммо кўплаб хитойлик жабрланувчилар эса ўз пулларини қайтаришни талаб қилмоқда.

Терговнинг аниқлашича, Цян «маъбуда» ва «малика» бўлишни орзу қилган ва бу ҳақда шахсий кундалигида ёзган.