Нидерландия Европа кенгаши раиси Антонио Коштанинг Украина ва Молдовага Венгрия ветосини четлаб ўтиб, Европа Иттифоқига кириш бўйича музокараларнинг биринчи босқичини очишга имкон берувчи таклифига қарши чиқди. Нидерландия музокаралар блокларини очиш бўйича якдиллик тамойилини ўзгартиришдан бош тортмоқда. Бу ҳақда 2 октябр, пайшанба куни Копенҳагенда Европа сиёсий ҳамжамияти саммитида Европа етакчилари билан учрашувдан сўнг Нидерландия бош вазири Дик Схоф расман маълум қилди.
Украинанинг келажаги Европа Иттифоқида, деди истеъфога чиқаётган бош вазир, «бу борада ҳеч қандай шубҳа бўлмаслиги керак». Бироқ, унинг қўшимча қилишича, Нидерландия Кошта таклиф қилганидек, музокаралар жараёнини шошқалоқлик билан бошлашга йўл қўймайди. Схоф Украина президенти Володимир Зеленскийнинг ҳафсаласи пир бўлганини тушунишини таъкидлади. «Зеленский фикрича, ҳар бир кечикиш Европа Иттифоқининг бироз узоқлашаётганини англатади», деди Схоф. Шу билан бирга, у Нидерландия учун тоза аъзолик жараёни катта аҳамиятга эга эканлигини таъкидлади. Схоф журналистларга Нидерландиянинг далилларини Зеленскийга тушунтирганини ва «яқин келажакда буни албатта такрорлашини» айтди.
Аввалроқ ЕИнинг юқори мартабали дипломати Брюсселда бўлиб ўтган брифингда Нидерландиянинг позициясини ЕИга кириш учун номзод давлат билан музокаралар блокларини очиш бўйича овоз беришда бир овоздан кўпчилик овозга ўтиш масаласи бўйича баён қилган эди. Дипломатнинг сўзларига кўра, Нидерландия ушбу муҳим масала бўйича қоидалар ўзгаришсиз қолиши керак, деб ҳисоблайди.
