Қўшимча функционаллар
-
Тунги кўриниш
Полша Меркелнинг Украинадаги уруш ҳақидаги сўзларини танқид қилди
Полша ташқи ишлар вазири Радослав Сикорский ва собиқ бош вазир Матеуш Моравецкий Ангела Меркелнинг Россиянинг Украинага бостириб кириши арафасида Варшаванинг Москва билан музокаралардаги ўрни ҳақидаги сўзларидан норозилигини билдирди.
Полша сиёсатчилари Ангела Меркелнинг Украинадаги уруш арафасида Варшава ҳаракатлари ҳақидаги баҳсли сўзларига изоҳ берди. Улар бу ҳақда 6 октябр, душанба куни айтиб ўтди.
Полша ташқи ишлар вазири Радослав Сикорский матбуот анжуманида Меркелнинг сўзларига ишонмаслик кераклигини айтди: «Мен бу сўзларни канцлернинг Марказий Европада «Шимолий оқим»га ҳеч ким норозилик билдирмагани ҳақидаги баёноти билан бир хил талқин қиламан. Эслатиб ўтаман, ўшанда мен орқамиздан тузилган келишувларни ёқтирмаслигимизни айтгандим. Канцлер ўшанда ҳам унга қандай қараганини эсдан чиқарган бўлса керак».
Полшанинг собиқ бош вазири Матеуш Моравецкий ҳам кескин танқид билан чиқди. У 2017 йилдан 2023 йилгача Полша вазирлар маҳкамасига раҳбарлик қилган, яъни Россиянинг Украинага бостириб киришидан олдинги йилларда Меркелнинг ҳамкасби бўлган. Полша сиёсатчисининг фикрича, у Европанинг урушга ҳисса қўшган Россияга қарамлиги учун жавобгардир. «Меркел Путинни танлади», деб ёзди у ижтимоий тармоқда.
«Демак, Европани Кремлга қарам қилиб қўйган канцлер айбдор эмас, балки Путин таҳдидидан огоҳлантирган Полша айбдор эканми? Бу ғайриоддий — қурбон ва айбдорни алмаштириш», — деб ҳисоблайди Моравецкий. «Меркел Россия билан муроса йўлини танлади, аммо уруш барибир юз берди. Энди эса у Полшани айбламоқда», — дея қўшимча қилди у.
«Биз натижаларни Буча, Мариупол, Лвив ва Киевда кўрдик — яқинда шарқий Полша осмонида, Дания аэропортларида ва бутун Скандинавияда», — деб ёзади Моравецкий. Унинг сўзларига кўра, Меркел сиёсати Европадаги уруш, энергия инқирози ва иқтисодий йўқотишларнинг сабабларидан бири бўлган.
Венгриянинг Partizán нашрига берган интервюсида Ангела Меркел 2021 йил июн ойида «Путин Минск келишувларини энди жиддий қабул қилмаётганини ҳис қилганини» айтди. Ўшанда канцлер, унинг сўзларига кўра, Кремл билан музокаралар учун «янги формат»ни хоҳлаган, аммо бу режа, гўёки Полша ва Болтиқбўйи давлатларининг қаршиликлари туфайли барбод бўлган.
Меркел Россия билан музокаралар муваффақиятсизликка учрагани ва Украинада уруш бошланишига ёрдам берганликда бевосита ҳеч бир томонни айбламади. Шунга қарамай, кўплаб оммавий ахборот воситалари унинг сўзларини шундай талқин қилди.
