Мерц Зеленский билан суҳбатдан кейин: Украинага тинчлик режаси керак

Зеленский билан суҳбатдан сўнг Германия канцлери Фридрих Мерц Украинага энди тинчлик режаси кераклигини айтди. Фридрих Мерц ва бошқа Европа етакчилари ҳам «Россияни музокаралар олиб боришга ундаш учун» мамлакатни қўллаб-қувватлашни кучайтиришга ваъда берди.

Фото: Frank Ossenbrink/IMAGO

Германия канцлери Фридрих Мерц Украина энди тинчлик режасига муҳтожлигини айтди. Бу ҳақда сиёсатчи 17 октябр, жума куни Украина президенти Володимир Зеленскийнинг АҚШ президенти Доналд Трамп билан учрашувидан сўнг Европанинг бошқа етакчилари билан телефон суҳбатидан кейин баёнот берди.

Суҳбат чоғида Европа етакчилари, жумладан Мерц, Германия ҳукумати вакили Штефан Корнелиуснинг сўзларига кўра, «Россияни жиддий музокаралар олиб боришга ундаш» учун Украинани қўллаб-қувватлашни кучайтиришга ваъда берди. Хусусан, улар санкциялар ва музлатилган Россия давлат активларидан фойдаланиш орқали Москвага босимни кучайтиришни режалаштирмоқда.

«Володимир Зеленский Германия ва европалик дўстларимиз томонидан тинчликка эришиш йўлида ҳар томонлама қўллаб-қувватланади», — дея Корнелиус Мерцнинг сўзларидан иқтибос келтирган. Қайд этилишича, Трамп билан учрашувдан сўнг Европа етакчилари Зеленский билан кейинги ҳаракатларни муҳокама қилган ва унинг кейинги қадамларини диққат билан кузатиш ниятида.

Украина раҳбари АҚШ президенти билан учрашувидан сўнг ва журналистлар билан гаплашишдан олдин европалик сиёсатчилар билан телефон орқали мулоқот қилди. Брифингда Зеленский суҳбатда Еврокомиссия раҳбари Урсула фон дер Ляйен, НАТО бош котиби Марк Рютте, Финландия президенти Александр Стубб, шунингдек, Буюк Британия, Италия, Норвегия ва Полша бош вазирлари иштирок этганини таъкидлади.

Тайёрлаган: Отабек Матназаров

#Украина #Володимир Зеленский #Фридрих Мерц