Европа етакчилари Украинадаги ҳарбий ҳаракатларни музлатишга чақирмоқда

Европа етакчилари АҚШ президенти Доналд Трампнинг кейинги музокаралар учун Украинадаги тўқнашув чизиғи бўйлаб ҳарбий ҳаракатларни музлатиш ҳақидаги таклифини қўллаб-қувватлади. Тегишли баёнот 21 октябр, сешанба куни Британия бош вазири Кир Стармер идораси томонидан эълон қилинди.

«Биз президент Трампнинг ҳарбий ҳаракатларни зудлик билан тўхтатиш ва ҳозирги тўқнашув чизиғи музокаралар учун бошланғич нуқта бўлиши кераклиги ҳақидаги позициясини қатъий қўллаб-қувватлаймиз», — дейилади баёнотда.

«Россиянинг чўзиш тактикаси Украина ҳақиқатан тинчлик тарафдори бўлган ягона томон эканлигини қайта-қайта кўрсатди. Биз ҳаммамиз Россия режими зўравонлик ва вайронагарчиликни танлашда давом этаётганини кўриб турибмиз», — дейилади баёнотда. 

Сиёсатчиларга кўра, Украина «энг кучли позицияда бўлиши керак — ҳар қандай сулҳдан олдин, унинг давомида ва кейин». Европа етакчилари Россия иқтисодиёти ва унинг мудофаа саноатига босимни кучайтиради ва «Украина зарур ресурсларни олиши учун Россиянинг музлатилган суверен активларидан максимал даражада фойдаланиш» чораларини ишлаб чиқмоқда.

Кейинги қадамлар 24 октябр куни Лондонда бўлиб ўтадиган Европа кенгаши ва «кўнгиллилар коалицияси» форматида муҳокама қилинади.

Баёнотни Буюк Британия бош вазири Кир Стармер, Германия канцлери Фридрих Мерц, Франция президенти Эммануэл Макрон, Италия бош вазири Жоржа Мелони, Полша бош вазири Доналд Туск, Европа комиссияси раиси Урсула фон дер Ляйен, Европа кенгаши раиси Антониу Кошта, Норвегия бош вазири Йонас Гар Стере, Финландия президенти Александер Стубб, Дания бош вазири Метте Фредериксен ва Украина етакчилик Володимир Зеленский имзолади.