Чоршанба куни кечқурун Ирландия пойтахти Дублин шаҳрида бошпана сўраб мурожаат қилган хорижликлар яшовчи меҳмонхона олдида давом этаётган тартибсизликлар доирасида икки полициячи жароҳат олиб, 20 дан ортиқ киши ҳибсга олинди. Намойишларга бир эркак шу меҳмонхона яқинида 10 ёшли қизга нисбатан жинсий зўравонлик қилишда айблангани сабаб бўлган.
Нималар бўлмоқда?
Бошпана сўраб келганлар яшайдиган Citywest меҳмонхонаси ёнида чоршанба куни кечқурун асосан ўсмирлар ва ёшлардан иборат намойишчилар тўпланди, деб хабар бермоқда RTE Ирландия полициясига (Гарда) таяниб.
Улар полициячиларга шишалар ва мушакбозлик отишган, кейин эса йўл ва трамвай бекатидаги тош деворларни бузиб, тошларни улоқтира бошлашган.
Полиция намойишчилар кўпайишига йўл қўймасликка ҳаракат қилган. Оқибатда икки ходим жароҳатланган: бирининг елкаси шикастланган, иккинчисининг бошига шиша теккан.
Полициячилар сув пуркагич (водомёт) қўллашга тайёр эди, аммо бунга ҳожат қолмаган.
23 киши қўлга олинган. Яқин кунларда уларга нисбатан жамоат тартибини бузиш бўйича айблов эълон қилиниши кутилмоқда.
Бу Дублиндаги тартибсизликлар иккинчи кун давом этиши. RTE маълумотларига кўра, сешанба куни Citywest меҳмонхонаси яқинида 2 минг киши тинч намойишга тўпланган, бироқ тез орада ниқоб таққан одамлар шишалар ва тошлар улоқтира бошлаган ва полиция машинасига ўт қўйган.
Биринчи куни олти киши ҳибсга олинган, бир полициячи оёғидан жароҳатланган.
Тартибсизлик икки ярим соатга яқин вақт давом этган, шундан кейин йиғилганлар тарқала бошлаган.
Тартибсизликларга нима сабаб бўлди?
Норозилик намойишига 10 ёшли қизга нисбатан жинсий зўравонлик содир этилгани ҳақидаги хабар сабаб бўлган. Ҳодиса душанба куни эрта тонгда бошпана излаб келганлар яшайдиган меҳмонхона яқинида содир бўлган. Полиция гумонланувчини қўлга олган.
