Kun.uzʼга маълум қилинишича, 27 июл куни Россия пойтахти Москва шаҳридаги қурилиш майдонларидан бирига кучишлатар органларнинг ходимлари келиб, ўз ишини давом эттираётган мигрантларни таҳқирлаган. Таҳририят билан гаплашган юртдошимизнинг айтишича, улар ҳудудга келиб, дастлаб барча муҳожир ишчиларни бир жойга йиғган. Уларнинг аксарияти ўзбек, қирғиз ва тожиклар бўлган. Мигрантлардан ҳеч қандай ҳужжат сўралмасдан, чўккалаб юришга мажбурланган.
Сўнгра уларнинг ҳужжатлари текширилган. Бироқ чўккалаб юрдирилганларнинг ҳамма ҳужжати жойида эди, ҳеч қандай сабабсиз шундай буйруқ беришди. Тахминимизча, улар Россия федерал миграция хизмати ходимлари эди, дейди Kun.uzʼга мурожаат қилган шахс.
Унинг қўшимча қилишича, воқеа кундузи, ишчилар ўз ишини одатий давом эттираётган бир онда, соат 10:00-17:00 оралиғида рўй берган. Ишчиларнинг ҳозир ҳамма ҳужжати жойида бўлиб, таҳқирланганидан норози. Лекин уларни ҳимоя қилувчи бирор орган йўқ.
Бу русча масхара қилишдан бошқа нарса эмас, бизнинг бирор айбимиз йўқ эди-ку, дейди юртдошимиз уларга нисбатан муносабатдан норозилигини билдираркан.
Эслатиб ўтамиз, ўтган йили Россия ҳуқуқ-тартибот тузилмалари Москва ва Санкт-Петербургда рейдлар ўтказиб, мигрантларга қўпол муносабатда бўлган. Шунингдек, улар ҳақоратланган, уларга нисбатан куч ишлатилган.
Шундан сўнг Ўзбекистон ТИВ Россия ТИВга нота йўллаганди. Бунга жавобан эса Россия ТИВ матбуот котиби Мария Захарова Москва Тошкентнинг нотасидаги маълумотларни диққат билан кўриб чиқаётгани, ўзбекистонлик ҳамкорларнинг тегишли сўрови ваколатли органларга юборилишини маълум қилган.
