«Олтин тўп»нинг саккиз карра ғолиби Лионел Месси Аргентина миллий жамоасидаги фаолиятини якунлашга қарор қилган. Бу ҳақда журналист Эрнан Кастилио хабар тарқатди.
Леонинг ўзи ҳозирча жим
Инсайдернинг сўзларига кўра, 39 ёшли ҳужумчи ЖЧ-2026 финалидаги мағлубиятдан кейин кийим алмаштириш хонасида эҳтиросли нутқ сўзлаган ва Испанияга қарши ўйин унинг миллий жамоадаги сўнгги ўйини бўлиб қолишини айтган.
ЖЧ-2026 ғолиблиги учун ҳал қилувчи ўйиндаги мағлубиятдан кейин Лионел анча вақт майдонда қолди ва «Албиселеста» мухлислари ўтирган трибунага қараб йиғлаб турди. Кўпчилик мухлислар буни унинг видолашуви сифатида қабул қилишган.
«Росарио» вингери ва Мессининг дўсти ҳисобланган Анхел Ди Мариянинг ижтимоий тармоқлардаги мурожаати ҳам турлича талқин қилинмоқда.
«Аргентиналик бўлганинг учун раҳмат. Байроғимизни дунёнинг энг юқори чўққисига олиб чиққанинг учун раҳмат. Футболчи сифатида ҳам, инсон сифатида ҳам намуна бўлганинг учун миннатдормиз. Сен тарихдаги энг буюклардансан. Сан абадийсан», – дея ёзган Ди Мария.
Шу билан бирга, Кастилио тарқатган инсайд хатолик бўлиб чиқишидан умид қилаётганлар ҳам бор. TyC Sport маълумотига кўра, Лео жаҳон чемпионатига бу борада олдиндан қарор қабул қилмасдан келган ва ўз яқинларига фаолиятини якунламоқчи эканини айтмаган. Нашрдагилар фикрича, бу айнан ҳозир рўй бериши эҳтимоли кам.
Аргентиналик футболчининг ўзи ҳозирча фаолиятини якунлаш қарори ҳақида эълон қилмади. Финал ўйинидан кейин у ўз ҳиссиётлари билан бўлишди ҳамда Испанияни ғолиблик билан табриклади.
«Оғриқ жуда кучли ва бу яра битиши учун вақт керак бўлади. Аммо мен барча яхши хотираларни ҳам ўзим билан олиб қоламан... Бор кучимизни бериб, тақдирини ўзгартирган ўйинларимиз ва уларнинг абадий хотираларда қолиши, бутун мамлакатнинг қўллаб-қувватлаши, шунингдек, бу жамоанинг меҳнати ва саъй-ҳаракати туфайли яна бир бор дунёнинг энг яхшилари қаторида бўлганимиз мен учун катта фахр.
Бугун қилган ишларимизни тўлиқ баҳолаш қийин, аммо бу жамоа кетма-кет икки марта Жаҳон кубоги финалига чиқишга муваффақ бўлди.
Ҳар бир табрик ва ҳар бир хабар учун чин қалбимдан катта раҳмат айтаман. Биз яна бир бор мамлакат сифатида бирлашдик ва барчамиз биргаликда аргентиналик бўлишдек улкан ғурурни ҳис қилдик. Испанияни ҳам чемпионлик билан табриклашни истардим», – дея ёзган футболчи ижтимоий тармоқлардаги саҳифаларида.
