Президент Брюсселда Европанинг етакчи компания ва банклари раҳбарлари билан учрашди

 Президент Шавкат Мирзиёевнинг сафари асосий тадбирлари 24 октябрга режаланган. Куннинг биринчи ярмида у Европанинг етакчи компания ва банклари раҳбарлари билан давра суҳбати ўтказди. 

 Учрашувда “Vandewiele”, “Linde”, “Rhenus Logistics”, “Ahlers Logistics”, “Lasselsberger Group”, “Pietro Fiorentini”, “NextChem”, “Meridiam”, “SUEZ”, “FMO”, “European Investment Bank”, “Commerzbank”, “KfW”, “Textima”, “Chimcomplex”, “Metso” ҳамда бошқа компания ва корпорацияларнинг раҳбарияти иштирок этди.

 Президент мулоқотда Европанинг етакчи компаниялари иштирок этаётгани юксак ўзаро ишонч ва узоқ муддатли шерикликка интилишнинг ифодаси эканини алоҳида таъкидлади.

Кенгайтирилган шериклик ва ҳамкорлик тўғрисидаги битимнинг имзоланиши Ўзбекистон ва ЕИ ўртасидаги муносабатларда янги даврни бошлаб бериши қайд этилди.

 Таъкидланишича, кейинги етти йилда товар айирбошлаш икки баробар кўпайган. Европа сармояси иштирокидаги қўшма корхоналар сони мингдан ошди. Бу кўрсаткичлар инвесторларнинг Ўзбекистондаги иқтисодий ислоҳотларга ишончи ортиб бораётганидан далолат беради.

 Европалик ҳамкорлар Ўзбекистон иқтисодиётини модернизация қилиш ва тубдан ислоҳ қилиш, илғор технологиялар, корпоратив бошқарув стандартларини жорий этиш ҳамда инновацион ишлаб чиқаришни ривожлантиришга кўмаклашаётгани қайд этилди. 

 Президент инсон капиталини ривожлантириш масалаларига алоҳида эътибор қаратди. Ёшларнинг олий таълим олиш имкониятлари сезиларли даражада кенгайтирилди. Янги олий ўқув юртлари ташкил этилди, хорижий университетлар филиаллари очилди, европалик ҳамкорлар билан қўшма таълим дастурлари амалга оширилмоқда.

 Учрашувда Мирзиёев ҳамкорликни янада чуқурлаштиришнинг тўрт муҳим йўналишини кўрсатиб ўтди. 

Ўзбекистон стратегик хомашё ва минералларни ўзлаштириш ва чуқур қайта ишлаш орқали юқори қўшилган қийматли тайёр маҳсулотлар ишлаб чиқариш бўйича лойиҳаларни биргаликда амалга оширишдан манфаатдор. 

 “Яшил иқтисодиёт” ва кимё саноати ҳам ҳамкорлик учун истиқболли йўналишлардир. Ўзбекистон қайта тикланадиган энергетикани фаол жорий этмоқда, энергетика тизимини модернизация қилмоқда. Европалик ҳамкорларга “яшил” энергетика, энергия тежаш ва экологик кимё лойиҳаларида иштирок этиш таклиф қилинди. 

 Инфратузилма ва логистикани ривожлантириш ҳам устувор аҳамиятга эга экани кўрсатиб ўтилди. Ўзбекистон автомобил йўллари, темирйўллар ва аэропортларни ўз ичига олган транспорт тармоғини модернизация қилмоқда. 

 Республика транзит йўналишларини ривожлантириш, Европа ва Осиёни боғлайдиган замонавий логистика марказларини барпо этиш бўйича қўшма лойиҳаларни амалга оширишга тайёр. 

 Рақамли иқтисодиёт ва ахборот технологиялари соҳасига алоҳида эътибор қаратилди.

 Бизнес доиралари билан мулоқотдан кейин президент Европа Иттифоқи комиссияси ва кенгаши биноси томон йўл олди.