«Шифохона, мактаб ҳамда Тошкент ҳалқа йўли лойиҳалари тендерларида қатнашяпмиз» – француз гигант корпорацияси президенти

Шавкат Мирзиёев Брюсселда учрашган бизнес доиралари сафида қиймати 25 млрд доллардан ортиқ бўлган гигант француз корпорацияси – «Meridiam» президенти ҳам бор эди. Тиерри Донинг Kun.uz мухбирига айтишича, айни пайтда компания Ўзбекистонда шифохона, мактаб ва Тошкент ҳалқа йўли бўйича тендерларда қатнашмоқда.

{Yii::t(}

Ўтказиб юбориш 6s

Ўтказиб юбориш

Франциянинг машҳур «Meridiam» инфраструктура сармояси ва актив менежменти корпорацияси 2005 йилда ташкил топган. Корпорация асосан жамоат учун инфратузилма лойиҳалари билан ишлайди. Сармоя киритади, узоқ муддатли бошқарувни қўлига олади.

Компания ижтимоий ва экологик қадриятларни доим ҳурмат қилиб келади. Унинг раҳбари Тиерри Дога кўра, Ўзбекистонда инфратузилма билан боғлиқ инвестиция киритиш мумкин бўлган ишлар жуда кўп.

– Сизни бу ерда, Белгияда кўриб турганимдан жуда хурсандман. Мен ўзбекистонлик журналистман. Аввало, президент билан учрашувингиз қандай ўтганини билмоқчи эдим.

– Президент билан учрашув жуда яхши ўтди. Бу, назаримда, сўнгги икки-уч йил ичида президент билан бешинчи учрашувим. Мамнуният билан айтишим мумкинки, амалга оширилган ислоҳотлар ва Ўзбекистоннинг француз фонд менежерлари ҳамда инфратузилма инвесторлари учун сармоявий жозибадорлиги туфайли биз, «Меридиам» компанияси сифатида бу жараён ва ишларнинг боришидан жуда мамнунмиз. Бизда Ўзбекистоннинг транспорт, шунингдек, таълим ва соғлиқни сақлаш соҳаларида хусусий шифохоналар орқали ривожланишини қўллаб-қувватлашга ёрдам берадиган жуда кўп инвестиция имкониятлари мавжуд. Бундан ташқари, сув ва чиқиндилар билан боғлиқ масалаларни ҳал қилиш орқали атроф-муҳитни муҳофаза қилиш йўналишида ҳам имкониятларни кўрганмиз.

– Компаниянгизнинг Ўзбекистон билан боғлиқ янги лойиҳа режалари қандай?

– Ҳа, биз ҳозирда эълон қилинган бир қатор давлат-хусусий шериклик тендерларида иштирок этмоқдамиз. Масалан, Фарғона шаҳридаги шифохона шулардан биридир. Шунингдек, биз мактаблар дастури ва Тошкент ҳалқа йўли лойиҳасини ҳам кўриб чиқмоқдамиз. Демак, булар биз Ўзбекистон учун таклифлар тайёрлаётган ва ечимлар олиб кираётган энг яқин имкониятлардир.

– Европа бизнесининг Ўзбекистон ҳукуматига қандай талаблари бор?

– Менимча, тезлик. Европа бизнеслари президентнинг ислоҳотларни амалга оширишда ҳамда Европа бизнеси учун бозор ҳамда имкониятларни очишда қатъиятли бўлганини юқори баҳолайди. Шунингдек, ўйлайманки, Европа бизнеси Ўзбекистонга энг яхши натижаларни олиб келиши учун комиссия, Европа инвестиция банки ҳамда Европа тикланиш ва тараққиёт банки (ЕТТБ) каби Европа институтлари билан ҳамкорлик қилишни ҳам маъқул кўради.

– Ўзбекистон бозори қанчалик қулай ўзи?

– Биз учун қулайлиги қандай? Ҳа, биз учун жуда қулай.

– Сизлар учун қулай эканини биламиз. Ўзбекистон бозори халқаро компаниялар, хусусан, Европа бизнеси учун қанчалик қулай?

– Айтганимдек, менимча, бир неча йил ичида қулайлик даражаси анча ошди, чунки раҳбариятда аниқ бир стратегик қараш мавжуд. Ҳозирги нотинч ва беқарор дунёда эса стратегик қараш ва барқарорлик бизнес кўришни истайдиган нарсадир.

– Адашмасам, компаниянгиз инфратузилма билан шуғулланади. Хўш, Ўзбекистонда бу соҳани яхшилаш бўйича қандай имкониятларингиз бор?

– Инфратузилмага сармоя киритишни жадаллаштириш ва бу борада қилинадиган ишлар жуда кўп. Менимча, автомобил ва темирйўллардан тортиб ижтимоий инфратузилмагача бўлган барча соҳаларда сармояларни жадаллаштириш учун давлат хусусий шерикчилиги модели яхши усул. Шу боис, бошланган ушбу дастур янада жадал давом этишига ва биз Ўзбекистон учун сифатли инфратузилма яратишимизга умид қиламиз – Тиерри До, «Meridiam» корпорацияси президенти