Демократлар Ню-Йорк, Виржиния ва Ню-Жерсида ғалаба қозонди — Трамп қайтганидан кейинги илк йирик ютуқ

Демократлар 4 ноябр куни, республикачи президент Дональд Трамп ҳокимиятга қайтганидан бери илк бор йирик учта сайловда ишончли ғалаба қозонди. Reuters таъкидлашича, бу натижалар 2026 йилда бўладиган Конгресс сайловлари олдидан заифлашган партияга янги туртки ва ишонч берди.

Ню-Йоркда 34 ёшли демократ социалист Зоҳран Мамданий мэр лавозимини қўлга киритди — у кам танилган депутатликдан Демпартиядаги энг ёрқин вакиллардан биригача тезда кўтарилди. Виржиния ва Ню-Жерсида эса мўътадил демократлар — 46 ёшли Эбигейл Спанбергер ва 53 ёшли Мики Шеррил — губернаторлик сайловларида ишончли фарқ билан ғалаба қилди.

«Агар миллатга — Дональд Трамп томонидан сотилган миллатга — уни қандай енгиш мумкинлигини кўрсата оладиган манзил бўлса, бу уни шакллантирган шаҳардир. Ва агар зулмкорни қўрқитиш йўли бўлса, бу у ҳокимиятга келишига имкон берган шартларни йўқ қилишдир, — деди Мамданий тарафдорлари олдида. — Шундай экан, Доналд Трамп, мени кўраётганингни биламан, сенга айтадиган гапим бор: товушни баландроқ қил».

Сешанба кунги сайловлар америкаликларнинг тўққиз ойлик Трамп президентлигига муносабатини ва демократларнинг 2026 йил сайловлари олдидан стратегиясини синаш бўлди. Оралиқ сайловларга ҳали бир йил бўлса-да, сўровлар президентнинг оммабоплиги пасайганига қарамай, Демократик партия рейтинги пастлигича қолаётганини кўрсатмоқда.

Энг амалий ютуқни демократлар Калифорнияда қўлга киритди — бу ерда сайловчилар сайлов округлари чегараларини Демократик партия манфаати йўлида ўзгартириш режасини маъқуллади. Reuters қайд этишича, бу қадам АҚШ бўйлаб Конгресс қўшма палатасида кучлар тақсимотига таъсир қилувчи округларни қайта тақсимлаш учун умуммиллий курашни кучайтиради.

Виржинияда Эбигейл Спанбергер республикачи Уинсом Эрл-Сирсни мағлуб этди ва республикачи Гленн Янкин ўрнини эгаллайди. Ню-Жерсида Мики Шеррил республикачи Жек Чаттареллини ортда қолдириб, демократ Фил Мёрфининг вориси бўлади.

Ҳар икки демократ рақибларини Трамп билан боғлашга уринди — бу орқали унинг сиёсатидан чарчаган сайловчиларни оғдириш кўзланган. «Биз дунёга сигнал йўлладик: Виржиния партиявийлик эмас, прагматизмни танлади, — деди Спанбергер ғалаба нутқида. — Биз хаос эмас, умумий фаровонликни танладик».

Reuters эслатишича, Трамп маъмурияти давом этаётган “шатдаун” пайтида федерал хизматчиларни ишдан бўшатиш билан қўрқитиб, рақибларга қўшимча танқид қилиш учун сабаб яратиб берди. Бу, хусусан, кўплаб давлат хизматчилари истиқомат қиладиган Виргинияга, шунингдек, Гудзон дарёси остида янги темирйўл туннели қурилишига ажратилган миллиардлаб долларлар музлатиб қўйилган Ню-Жерсига жиддий зарба берди.

Виржинияда сайлов участкаларида овоз берувчиларнинг кўпчилиги қарорини Трамп сиёсатидан норозилик билан изоҳлади — хусусан, ноқонуний мигрантларни депортация қилиш режалари ва импорт товарларга юқори божларни жорий этиш ташаббуслари туфайли. Бу чораларнинг қонунийлиги АҚШ Олий судида кўриб чиқилмоқда.