ГФР россияликларнинг биометрик бўлмаган паспортлар билан киришини тақиқлайди

1 январдан Россия фуқаролари Германияга кириш визасини фақат биометрик паспортлар орқали олиши мумкин бўлади. Илгари биометрик бўлмаган паспорт эгаларига берилган визалар эса амал қилиш муддати тугагунча кучида қолади.

Фото: ИЗВЕСТИЯ/Анна Селина

2026 йил 1 январдан бошлаб Россия фуқароларига Германияга кириш визасини олиш учун биометрик хорижга чиқиш паспорт талаб этилади, деб хабар берилди 5 ноябр куни ГФРнинг Россиядаги ваколатхоналари сайтида. РФнинг биометрик бўлмаган хорижий паспортларидан фойдаланиш фақат уларда амалдаги Германия визаси мавжуд бўлган ҳоллардагина мумкин бўлади.

Шу билан бирга, жорий йилнинг 31 декабригача Германиянинг хориждаги ваколатхоналари россиялик биометрик бўлмаган паспорт эгаларини ҳам виза билан таъминлашда давом этади ва бундай визалар Германияга кириш ва бўлиб туриш учун қўшимча ҳужжатларсиз қўлланиши мумкин, дейилади кейинги хабарда. “Агар сиз визага ариза берган бўлсангиз ва у 2025 йил 31 декабргача кўриб чиқилмаган бўлса, визани олиш учун қўшимча тарзда Россиянинг биометрик хорижга чиқиш паспортини тақдим этишингиз керак бўлади”, — деб маълум қилди ГФР элчихонаси.

2026 йил 1 январдан бошлаб Германияга янги виза учун ариза топшириш ёки олдин берилган рухсатномани узайтириш фақат РФ биометрик паспортини тақдим этган ҳолда мумкин бўлади. Шунингдек, Германияга саёҳат қилиш режалаштирилган бўлса, бошқа шенген мамлакатлари ваколатхоналарида виза расмийлаштиришда ҳам худди шу қоидалар амал қилади, деб қўшимча қилди Германия элчихонаси.

Биометрик паспортда ҳужжат эгасининг шахсий маълумотлари, жумладан, сурат ва бармоқ излари сақланувчи электрон чип мавжуд. Унинг амал қилиш муддати — биометрик бўлмаган паспортлардаги 5 йил ўрнига 10 йил. Бундан ташқари, у янги ҳужжат стандартларини тан олган мамлакатларга визасиз ёки соддалаштирилган тартибда кириш имкониятларини кенгроқ яратади.

Германия расмийлари биометрик бўлмаган хорижга чиқиш паспортига эга ва Германияга сафар қилмоқчи бўлган россияликларни биометрик ҳужжат расмийлаштиришга чақирди. “Германия визасини бериш бўйича мазмунан талаблар ўзгаришсиз қолади”, — деб қўшимча қилди ГФР элчихонаси.

Шу каби қарорларни аввалроқ Дания, Чехия, Франция, Эстония, Латвия, Литва, шунингдек Шенген ҳудудига кирувчи Исландия ҳам қабул қилган эди.

Тайёрлаган: Отабек Матназаров

#Россия #Германия