РФ Бош прокуратураси Ходорковский таъсис этган лицейни миллийлаштиришни сўрамоқда

Россия Бош прокуратураси Москва яқинида, Кораллово посёлкасида жойлашган “Подмосковный” лицей-интернати — ЮКОСнинг собиқ эгаси ва ҳозир хориждаги россиялик мухолифат етакчиларидан бири Михаил Ходорковский ҳамда унинг ҳамкори Платон Лебедев ташкил этган муассасани миллийлаштиришни талаб қилди. Мос даъво Мешчанский туман судига киритилгани ҳақида “Интерфакс”га 6 ноябр куни ушбу ҳужжат билан таниш манба хабар берди.

“Назорат тадбирлари жараёнида умумтаълим муассасаси — ‘Лицей-интернат “Подмосковный”’ ижро иши бўйича қарздорлар — Ходорковский ва Платон Лебедевга амалда тегишли экани аниқланди. Шу сабаб у давлат даромадига ўтказилиши лозим”, — деб манбанинг сўзларидан иқтибос келтиради агентлик. Таъминот чораси сифатида прокуратура лицей мол-мулки, жумладан пул маблағларига ҳам ҳибс қўйишни сўрамоқда.

Даъвода лицейдаги таълим “сиёсий жиҳатдан ўзгача” экани ва болаларда “Россияга қарши кўринишларга лоял муносабат” шакллантираётгани иддао қилинган. Шунингдек, Бош прокуратура маълум қилишича, лицей РФда “номақбул ташкилот” деб эълон қилинган “Ходорковский жамғармаси”, шу билан бирга суд Ходорковский ва Лебедевга тегишли, деб топган “Паррингроув” компанияси маблағлари ҳисобидан молиялаштирилади.

Иқтидорли етим болалар ва ижтимоий ҳимояга муҳтож гуруҳлардан чиққан болалар учун мўлжалланган “Подмосковный” лицей-интернати 1994 йилда Одинцово туманидаги собиқ дворян усадбасида очилган. “Настоящее время” телеканали таъкидлашича, у ерда террор ҳужумларидан жабрланган болалар ва ҳалок бўлган ҳарбий хизматчиларнинг фарзандлари ҳам ўқиган. Россия расмийларига кўра, лицей мулки таркибига 86 гектар ер, 5 та турар ва 40 та нотурар бинолар (умумий майдони 25 минг квадрат метрдан ортиқ) киради.

Октябр ўрталарида РФ ФСБ Михаил Ходорковский ва “Россиянинг Урушга қарши қўмитаси”нинг бошқа иштирокчиларига нисбатан “ҳокимиятни зўравонлик билан эгаллаш” ва “террористик уюшма ташкил этиш ёки унда иштирок этиш” моддалари бўйича жиноят иши қўзғатилганини маълум қилди. ФСБ таъкидлашича, 2022 йил февралда ташкил этилган ушбу қўмитанинг мақсадлари “ҳокимиятни зўравонлик билан эгаллаш” ва Россияда “конституциявий тузумни ўзгартириш”дир. Ходорковский 2013 йилда ЮКОС бўйича учта иш доирасида колонияда 10 йил ўтказганидан сўнг озод этилган ва шу пайтдан бери чет элда яшаб келади.