Мадуро АҚШдан хавфсизлик кафолатлари эвазига истеъфога чиқишга тайёр

Венесуэла президенти Николас Мадуро, агар АҚШ унга ва унинг қўл остидагиларига амнистия эълон қилса, уни қўлга олиш учун белгиланган мукофотни бекор қилса ва сургунда қулай ҳаёт кафолатласа, истеъфога тайёр. Бу ҳақда 6 ноябр куни The Atlantic журнали Венесуэла раҳбарияти кайфиятидан “хабардор манбалар”га таяниб хабар қилди. Манбаларга кўра, Вашингтон вакиллари Мадуронинг “назоратли тарзда кетиши” имкониятини унга ва яқин ҳамкорларига хавфсизлик кафолатлари эвазига муҳокама қилмоқда.

“Етарли даражада босим бўлса ва таклиф етарлича жозибадор бўлса, Мадуро билан барча вариантларни муҳокама қилиш мумкин”, — дея музокара доирасидаги манбанинг сўзларини келтиради The Atlantic. Журнал қайд этишича, Венесуэла раҳбари АҚШнинг кучайиб бораётган ҳарбий босими шароитида чиқиш йўлларини изламоқда: АҚШ венесуэлалик наркокартелларга қарши уруш эълон қилган.

Бундан бир неча кун олдин АҚШ президенти Доналд Трамп Николас Мадуронинг давлат раҳбари сифатидаги кунлари саноқли экани ҳақида фикр билдирган, бир вақтнинг ўзида АҚШнинг Венесуэла билан уруш эҳтимолига шубҳа билдирган эди. Мадуро эса Трамп маъмурияти томонидан қўйилаётган гиёҳванд савдоси бўйича айбловлар Каракасда “режимни алмаштиришни мажбурлаш” ва Венесуэла нефтини қўлга киритиш учун баҳона сифатида тилга олинаётганини айтди.

Сентябр бошидан Америка ҳарбий кемалари халқаро сувларда ҳаракатланаётган, Вашингтон томонидан венесуэлалик наркокартеллар билан алоқадор, деб гумон қилинган кемаларга доимий зарбалар бериб келмоқда. Шу билан бирга АҚШ Венесуэла қирғоқлари яқинига кичик денгиз гуруҳини жойлаштирди ва Пуэрто-Рикога қирувчиларни юборди.

Сентябр ўрталарида Каракас ўз ҳудудий сувларида ҳарбий машқлар ўтказгач, қатор ОАВ Трампнинг Венесуэла билан муносабатларни йўлга қўйиш уринишларини тўхтатганини хабар қилди. The New York Times’нинг маълумотича, Вашингтонда можарони кучайтиришнинг бир нечта сценарийлари ишлаб чиқилган, жумладан Мадурони ҳокимиятдан куч билан четлатиш варианти ҳам бор.