Қўшимча функционаллар
-
Тунги кўриниш
Ҳиндистон декабр ойига Россия нефти харидларини қисқартирди
Bloomberg агентлигининг манбаларига таяниб ёзишича, Ҳиндистоннинг беш йирик нефт қайта ишлаш компанияси келаси ой учун Россия нефтини сотиб олиш бўйича буюртма жойлаштирмади.
Фото: Biju Boro/AFP
Ҳиндистон декабр ойида етказиб бериш учун Россия нефти харидларини қисқартирди, деб ёзади Bloomberg 11 ноябр куни. Унинг маълумотича, бу «ғарб санкциялари ва АҚШ билан савдо музокаралари харидлар тузилмасига жиддий таъсир қилаётганидан далолат беради».
Манбаларга таяниб хабар қилинишича, одатда жорий ойнинг 10 кунига қадар амалга ошириладиган жараёнга зид равишда, бир йўла беш йирик НҚЗ келаси ой учун Россия нефтини сотиб олиш бўйича буюртма бермаган. Қайд этилганидек, бу ўзгариш АҚШ президенти Доналд Трамп Ҳиндистон импорт товарларига божларни 50 фоизгача оширгани ва кейинчалик Кремл томонидан Украинада уруш тўхтатилмагани боис «Лукойл» ҳамда «Роснефть»га нисбатан санкциялар жорий этганидан сўнг рўй берди.
Bloomberg’нинг Kpler таҳлил компанияси маълумотларига таяниб ёзишича, беш нефтни қайта ишлаш компанияси — Reliance Industries Ltd., Bharat Petroleum Corp. Ltd., Hindustan Petroleum Corp. Ltd., Mangalore Refinery and Petrochemicals Ltd. ва HPCL-Mittal Energy Ltd. «жорий йилда Ҳиндистоннинг Россия нефти импорти учдан икки қисмини таъминлаган». Шу билан бирга, айнан шу компаниялар декабр ойи учун Россия нефтидан воз кечган-кечмагани кўрсатилмаган. Декабрга «маълум миқдорда Россия нефти»ни фақат икки қайта ишловчи сотиб олгани айтилган: Indian Oil Corp — санкциялар рўйхатига кирмаган сотувчилардан — ва қисман «Роснефть»га тегишли Nayara Energy Ltd.
2 ноябр куни Reuters агентлиги манбаларига таяниб, АҚШ, Европа Иттифоқи ва Буюк Британия Россия нефт секторини нишонга олган санкциялар жорий этгандан кейин, Туркиядаги НҚЗ Ироқ ва Қозоғистондан кўпроқ нефт харид қила бошлаганини ёзди. Суҳбатдошлар агентликка Туркиянинг икки йирик НҚЗсига эга Tupras компанияси яқин орада заводлардан бири учун Россия нефтини импорт қилишни бутунлай тўхтатиши мумкинлигини тахмин қилган.
10 ноябр куни эса АҚШ вице-президенти Жей Ди Вэнс ва давлат котиби Марко Рубио Туркия ташқи ишлар вазири Хоқон Фидан билан учрашувда Вашингтоннинг НАТОдаги барча иттифоқчиларини Россия энергетика манбаларини харид қилишни тўхтатишга яна бир бор чақирди. «Қўшма Штатлар, шунингдек, Украинада давом этаётган урушни тўхтатишга ёрдам бериш мақсадида, президент Трампнинг барча НАТО иттифоқчиларига Россия энергия манбаларини харид қилишни тўхтатиш бўйича чақириғини яна бир бор таъкидлади», — дейилган АҚШ Давлат департаменти сайтида эълон қилинган пресс-релизда.
