Ўзбекистон ва Литва меҳнат миграцияси соҳасида ҳамкорликни кучайтиради

12 ноябр куни Ўзбекистон ташқи ишлар вазири ўринбосари Олим Абдуллаев Литванинг Ўзбекистондаги элчиси (қароргоҳи Остона шаҳрида) Эгидиюс Навикас билан учрашув ўтказди. Томонлар меҳнат миграцияси, ноқонуний миграцияга қарши курашиш ҳамда консуллик йўналишидаги ҳамкорликни кенгайтириш масалаларини муҳокама қилди.

Фото: Ташқи ишлар вазирлиги

Ўзбекистон ташқи ишлар вазири ўринбосари Олим Абдуллаев Литва Республикасининг Ўзбекистондаги элчиси (қароргоҳи Остона шаҳрида) Эгидиюс Навикас билан учрашув ўтказди.

Учрашувда меҳнат миграцияси соҳасидаги икки томонлама ҳамкорлик масалалари муҳокама қилинди. Жумладан, ҳукуматлараро битимларни имзолашни жадаллаштириш, консуллик маслаҳатлашувларини ташкил этиш, шунингдек, ноқонуний миграция ва радикаллашувга қарши курашиш чоралари юзасидан фикр алмашилди.

Томонлар доимий мулоқотни давом эттиришдан ўзаро манфаатдор эканини тасдиқлади ва ҳамкорликни мустаҳкамлаш бўйича қўшма чора-тадбирлар тўғрисида келишиб олди.