Қамчиқ ва Дарбанд довонларида қатнайдиган тезюрар поездлар Жанубий Кореядан харид қилинади

Тошкентдан водийга, Қашқадарёдан Сурхондарёга довон орқали ўтган темирйўлларда ҳаракатланадиган янги тезюрар поездлар Жанубий Кореядан харид қилинади.

Транспорт вазири Илҳом Маҳкамов маълум қилишича, Жанубий Кореянинг Hyundai Rotem компаниясидан 6 та тезюрар ҳаракат таркиби сотиб олинмоқда. Уларнинг илк партияси жорий йилнинг декабр ойидан бошлаб Ўзбекистонга кела бошлайди.

Ушбу поездлар келаси йилдан бошлаб Бухоро — Мискин — Урганч — Нукус йўналишларида ҳаракатланиши режалаштирилган.

“Ўзбекистон темирйўллари” раҳбари Зуфар Нарзуллаевнинг таъкидлашича, тоғли ҳудудлардаги темирйўллар — жумладан, Қамчиқ ва Дарбанд довонлари орқали ўтувчи йўналишлар учун 2030 йилгача яна 8 та тезюрар поезд харид қилиниши кўзда тутилган.

Англашилишича, янги ҳаракат таркиблари йўловчилар учун қулайликни ошириш, саёҳат вақтини қисқартириш ва тоғли йўналишларда темирйўл инфратузилмасини янада замонавийлаштиришга хизмат қилади.