Тошкент Марказий Осиё раҳбарларининг еттинчи саммитига мезбонлик қилади

15–16 ноябр кунлари Тошкент шаҳрида Ўзбекистон президенти Шавкат Мирзиёев раислигида Марказий Осиё давлатлари раҳбарларининг еттинчи Маслаҳат учрашуви бўлиб ўтади. Саммитда минтақадаги барча давлатлар раҳбарлари, шунингдек, Озарбойжон Президенти ва БМТнинг Марказий Осиё бўйича минтақавий маркази раҳбари иштирок этади.

Фото: Президент матбуот хизмати

Тошкент шаҳрида Ўзбекистон президенти Шавкат Мирзиёев раислигида Марказий Осиё давлатлари раҳбарларининг еттинчи Маслаҳат учрашуви бўлиб ўтади.

Саммитда Озарбойжон президенти Илҳом Алиев, Туркманистон президенти Сердар Бердимуҳамедов, Тожикистон президенти Имомали Раҳмон, Қозоғистон президенти Қосим-Жўмарт Тўқаев, Қирғизистон президенти Садир Жапаров, шунингдек, БМТнинг Марказий Осиё учун превентив дипломатия бўйича минтақавий маркази раҳбари Каха Имнадзе иштирок этади.

Тадбир кун тартибига Марказий Осиёда минтақавий ҳамкорликни янада мустаҳкамлаш, устувор соҳаларда қўшма лойиҳалар ва ташаббусларни амалга ошириш масалалари киритилган. Шунингдек, минтақавий ва халқаро сиёсатнинг долзарб масалалари юзасидан ҳам фикр алмашиш режалаштирилган.

Маслаҳат учрашуви якунида кўп томонлама ҳужжатларнинг салмоқли тўпламини қабул қилиш кутилмоқда.

Марказий Осиё давлатлари раҳбарларининг мунтазам маслаҳатлашувларини ўтказиш ташаббуси Ўзбекистон етакчиси томонидан 2017 йил сентябр ойида БМТ Бош Ассамблеясининг 72-сессиясида илгари сурилган эди.

Ўзбекистоннинг ушбу форматдаги раислиги даврида ҳамкорликнинг турли соҳаларини қамраб олган 20 дан ортиқ йирик тадбирлар ўтказилди.