БМТ: Украинада уруш сабаб мисли кўрилмаган уй-жой инқирози юзага келди

БМТ ҳузуридаги Халқаро миграция ташкилоти (IOM)нинг ҳисоботида Украинадаги уруш натижасида юзага келган уй-жой вазияти таҳлил қилинган. Унга кўра, уй-жой фондининг тахминан 10 фоизи зарар кўрган ёки фойдаланиш учун яроқсиз ҳолатда.

Фото: Michael Shtekel/AP

Украинадаги тўлиқ миқёсли уруш давомида 236 мингдан ортиқ бино вайрон қилинган ёки шикастланган, 2,5 миллиондан зиёд уй-жой бирлиги (бу уй-жой фондининг тахминан 10 фоизини ташкил этади) турли даражада шикастланган ёки давом этаётган қуролли можаро сабаб фойдаланиш учун яроқсиз ҳолатда. Бу ҳақда 16 ноябр куни эълон қилинган, БМТ ҳузуридаги Халқаро миграция ташкилоти (IOM)нинг ҳисоботида айтилади. Ҳисоботда бу ҳолат "мисли кўрилмаган уй-жой инқирози" сифатида баҳоланган.

Ҳужжатда қайд этилишича, уй-жойнинг мавжудлиги ва унинг нархига муниципал уй-жойларнинг етишмаслиги, ижара бозорининг етарлича тартибга солинмагани, шунингдек, урушдан оммавий қочиш жараёни кескин таъсир кўрсатган.

IOM экспертларининг баҳолашича, тахминан 10,6 миллион украиналик ўз уйини тарк этишга мажбур бўлган — бу мамлакатнинг урушдан олдинги аҳолисининг қарийб тўртдан бир қисмига тўғри келади. Уларнинг аксарияти чет элга чиқиб кетган. Мамлакатни тарк этмаган 3,7 миллион қочқиннинг учдан икки қисми янги уй-жой учун тўлов қилишда қийналмоқда. "Кўплаб оилалар ижара бозорига тўлиқ боғланиб қолгани сабабли, уларнинг оилавий жамғармалари бутунлай сарфланиб бўлди", — дея таъкидлайди ҳисобот муаллифлари.

Ҳисоботда, шунингдек, уй-жой ижарасини тўлаш юки ўз уйларини тарк этган одамлар учун жуда оғирлигича қолaётгани қайд этилади, чунки улар уй ижарасига ўз даромадларининг 50 фоизи ёки ундан кўпроғини сарфлашга мажбур.