Ўзбекистонлик тадбиркор Рустам Мўминов Европа Иттифоқи санкциялари рўйхатига киритилди

Ўзбекистон, Россия ва Буюк Британия фуқаролигига эга экани келтирилган Рустам Мўминов Европа Иттифоқи санкциялари рўйхатига киритилди. Бунга у эгалик қилувчи заводнинг маҳсулотлари Перм ва Қозон порох заводларига етказиб берилгани асос сифатида қайд этилган.

Фото: Сергей Ведяшкин / АГН Москва

Европа Иттифоқи 19-санкциялар пакетига ўзбекистонлик тадбиркор Рустам Мўминовни ҳам киритди. Ўзбекистон, Россия ва Буюк Британия фуқаролигига эга экани келтирилган Мўминовнинг чекловларга учраши Россия ҳарбий-саноат комплексини қўллаб-қувватлаш билан боғлиқ.

Қайд этилишича, тадбиркор целлюлоза ишлаб чиқариш билан шуғулланадиган «Фарғона кимё заводи» МЧЖга эгалик қилади. Унинг маҳсулотлари Перм ва Қозон порох заводларига етказиб берилгани келтириляпти.

Ўз навбатида «Фарғона кимё заводи» 2016 йилда Тошкент шаҳрида давлат рўйхатидан ўтган «Mercury Renaissance» МЧЖ таркибига киради. Фаолият тури – қурилиш техникаси ва ускуналарини ижарага бериш ҳамда лизинг хизматлари бўлган компания таъсисчилари – Мўминов Рустам Раҳимжанович (60 фоиз) ва Тожиев Шаҳриёр Саҳиёрович (40 фоиз) бўлиб келган. Кейинчалик Рустам Мўминовнинг улуши Олга Шагиевага ўтказилади.

Аввалроқ Украина ҳам Ўзбекистоннинг учта компаниясига санкциялар киритгани хабар қилинганди. Санкциялар рўйхатидан «Raw Materials Cellulose», «Фарғона кимё заводи» ҳамда «Mercury Renaissance» МЧЖ жой олганди.