Автомобилларга экостикерлар берилади: “яшил”, “сариқ” ва “қизил” тоифалар жорий этилади

Ҳукумат қарори билан, автотранспорт воситалари чиқарган газнинг зарарлилик даражасини аниқлаш, уларни экологик тоифаларга ажратиш ва экологик стикерларни бериш тартибини белгилайдиган низом тасдиқланди. Унга кўра, машиналар экологик синфига қараб “тоза”, “ўрта” ва “зарарли” тоифаларга бўлинади ҳамда шу асосда рангли стикерлар билан белгиланади.

Фото: Тошкент шаҳар ҳокимлиги

Низомга кўра, транспорт воситасининг экологик тоифаси – унинг ишлаб чиқарувчи томонидан белгиланган экологик синфига мувофиқ аниқланади.

Шу асосда, бензин, сиқилган ва суюлтирилган газда ҳаракатланувчи авто:

“Евро-2” ва ундан юқори – “тоза” экологик тоифа;
“Евро-0” ва “Евро-1” – “ўрта” экологик тоифа;

дизел ёнилғисида ҳаракатланувчи авто:

“Евро-4” ва ундан юқори – “тоза” экологик тоифа;
“Евро-3” – “ўрта” экологик тоифа;
“Евро-0”, “Евро-1”, “Евро-2” – “зарарли” экологик тоифа;

гибрид автомобиллар, муқобил ёнилғи турларида ҳаракатланувчи транспорт воситалари, шунингдек ишлаб чиқарилганига 3 йилдан ошмаган авто – автоматик равишда “тоза” экологик тоифага киради.

Транспорт воситаларини рўйхатга олиш ва қайта рўйхатга олиш жараёнида уларнинг тоифасига мос равишда:

“тоза” тоифа учун – “яшил”,
“ўрта” тоифа учун – “сариқ”,
“зарарли” тоифа учун – “қизил” рангли экологик стикерлар Давлат йўл ҳаракати хавфсизлиги бўлинмаларида экологик операторлар томонидан берилади.

Транспорт эгалари, шунингдек, ихтиёрий равишда экологик стикер олиш учун ЙҲХХга унинг расмий веб-сайти ёки my.gov.uz (ЯИДХП) орқали мурожаат қилиши мумкин. Ариза белгиланган мезонларга жавоб берганда, машинанинг экологик тоифасига мос стикер берилади.

Экологик стикерлар муддатсиз даврга берилади.