Украинанинг истеъфога чиққан бош музокарачиси, қуролсиз асирни отган Исроил полицияси ва Россиянинг портлаган танкерлари – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

{Yii::t(}

Ўтказиб юбориш 6s

Ўтказиб юбориш

Исроил икки фаластинлик асирни отиб ташлади

Ғарбий соҳилда рейд ўтказган Исроил ҳарбийлари икки фаластинликни қўлга олинган жойида отиб ўлдирди. Пайшанба оқшомидаги отишма видеога тушиб қолган, воқеа жойига яқин бўлган журналистлар ҳам унга гувоҳ бўлган.

Тармоқларда тарқалган видеода — Исроил аскарлари омборхона кўринишидаги бинони қуршаб олгани кўринади. Ҳарбийлар механик экскаватор ёрдамида гараж эшигини бузиб киради. Шундан сўнг икки эркак шикастланган эшик остидан қўл кўтариб чиқади ва қуролсиз эканини намойиш этиб, таслим бўлади.

Исроил чегара полицияси ходимларидан бири эркакларни ерда ётган пайти тепган ва яна бино ичига қайтишни буюрган. Бир неча сониядан кейин беш нафар чегара полициячиси қуролсиз асирларни отиб ташлайди.

Исроил Мудофаа кучлари Женин атрофидаги қўшма операция чоғида икки эркакни отиб ташлагани тан олинди. IDFʼнинг айтишича, отишма «қўмондонлар томонидан кўриб чиқилмоқда ва тегишли мутахассис органларга топширилади».

The Guardian нашрининг ёзишича, фаластинлик гуруҳларидан бири икки эркак Ал-Қудс бригадаларининг жангчилари эканини билдирган.

«Биз кеча Женинда Исроил чегара полицияси томонидан икки фаластинлик эркакнинг очиқчасига ўлдирилганидан ларзадамиз. Бу яна бир яққол хулосавий қатл ҳолати», деди БМТ Инсон ҳуқуқлари бошқармаси матбуот котиби Жереми Лоуренс.

«Исроилда фаластинликларнинг ўлдирилишини тўхтатадиган ёки айбдорларни жавобгарликка торта оладиган ҳеч қандай механизм йўқ», дейди инсон ҳуқуқлари фаоли Юли Новак.

Аслида уруш ва можаролар вақтида ҳам қуролсиз асирларни қатл қилиш — ҳарбий жиноят ҳисобланади.

Пайшанба куни Жениндаги қотилликни бошқалардан ажратиб турадиган нарса — видео далилининг равшанлиги. Лекин Исроил аскарлари ва полицияси фаластинликларни ўлдириш ҳоллари юзасидан юзлаб шикоятларга қарамай, жуда кам ҳолатда жавобгарликка тортилади.

Украина бош музокарачиси истеъфога чиқди

Украина президенти маъмуриятининг кучли таъсирга эга раҳбари Андрей Ермак — коррупцияга қарши агентлар унинг уйини тинтув қилганидан бир неча соат ўтиб, истеъфога чиқди. У АҚШ қўллаб-қувватлаган, мураккаб тинчлик музокараларида Украина делегациясини бошқариб келаётган эди.

Шунингдек, у президент Володимир Зеленскийнинг яқин иттифоқчиси эди. У Зеленский президент бўлишидан олдин ҳам унинг яқин дўсти бўлиб келган ва 2019 йилдаги сайлов кампаниясини бошқаришда муҳим рол ўйнаган.

Ермак квартираси тинтув қилинганини тасдиқлади ва терговчиларга ҳамкорлик қилаётганини билдирди. Миллий коррупцияга қарши бюро тинтув қайси тергов билан боғлиқ эканини очиқламади.

Ноябрда антикоррупцион органлар давлат атом энергетикаси компаниясининг собиқ мансабдорлари ва Зеленскийнинг собиқ бизнес ҳамкорларидан бирини ўз ичига олган тергов бошлаган эди. Гап – 100 миллион долларлик пора схемаси бўйича текширув ҳақида кетмоқда.

Украина Россия билан курашаётган бир пайтда, юқори мартабали мансабдорлар ўртасидаги йирик коррупцион тергов жамоатчиликнинг ғазабини қўзғатди ва мамлакат раҳбариятини инқирозга дуч қилди. Бу орада Вашингтон Киевни келишувга кўндириш учун босимини кучайтирмоқда.

«Россия Украина хато қилишини истайди. Биз бундай қилмаймиз», деди Зеленский жума кунги видеомурожаатида бирдамликка чақираркан. «Бизнинг ишимиз давом этади. Курашимиз давом этади», деди у.

Ҳонгконгдаги ёнғин иши бўйича 8 киши ҳибсга олинди

Ҳонконг тарихидаги энг даҳшатли ёнғинлардан бирида ҳалок бўлганлар сони 128 кишига етди. Ёнғин – 40 соатдан кўпроқ муддатда тўлиқ жиловланди. Оролда расман уч кунлик мотам бошланди.

Тахминан 200 киши ҳануз бедарак йўқолганлар рўйхатида, 89 жасаднинг эса ҳали шахси аниқланмаган. Одамлар касалхоналар ва моргларни кезиб, яқинларини топишга уринмоқда.

Жума куни шаҳар коррупцияга қарши идораси ёнғинга алоқадор деб гумон қилинган саккиз кишини қўлга олди.

Расмийларнинг айтишича, ёнғин сабаби ҳали аниқланмаган. Бироқ дастлабки текширувларга кўра, олов бир миноранинг пастки қаватларидаги ҳимоя тўридан бошланган ва «ўта ёнувчан» кўпик панеллар ҳамда бамбуклар унинг тез тарқалишига ёрдам берган.

Ёнғин хавфсизлиги хизмати раҳбари Энди Йонг саккизта уйнинг барчасида ёнғин сигнализацияси «носоз бўлгани»ни айтиб, пудратчиларга қарши чора кўрилишини ваъда қилди.

Қора денгизда Россия танкерлари портлади

28 ноябр куни Россиянинг «соя флоти»га мансуб икки танкер Қора денгизда портлаб кетди. Туркия расмийлари Босфор яқинида кемаларда бортдагиларни қутқариш бошланганини билдирди.

Хусусан, 274 метр узунликдаги Каирос танкери Мисрдан Россияга йўл олаётган пайтда Қора денгизда портлаш содир бўлган ва ёнғин чиққан.

Туркия Транспорт вазирлигига кўра, ҳодиса жойига зудлик билан қутқарув қайиқлари юборилган ва бортдаги 25 нафар экипаж аъзоси хавфсиз қутқарилган. Денгиз ишлари бошқармаси маълумотига кўра, Каирос кемасига қирғоқдан 28 км узоқликда «ташқи таъсир» бўлган.

Яна бир танкер — Вират эса Қора денгизнинг шарқий қисмида, қирғоқдан тахминан 35 денгиз мили масофада “зарба олгани” айтилмоқда. Кеманинг двигател бўлимида қалин тутун аниқланган, аммо бортдаги 20 нафар ходимнинг аҳволи яхши.

Иккала танкер ҳам юксиз ҳолда бўлган. Туркия расмийлари ҳодисалар тафсилотларини очиқламади.

Турк ОАВлари кемалар минага урилган бўлиши мумкинлигини тахмин қилмоқда. Расмийлар назарда тутган «ташқи таъсир» ҳам айнан миналар бўлиши мумкин.

Каирос ҳам, Вират ҳам Украинадаги уруш бошланганидан сўнг жорий этилган санкциялар рўйҳатига тушган.

Шри-Ланкада циклон қурбонлари

Жума куни Шри-Ланкага ёпирилган «Дитваҳ» циклони кенг кўламли сув тошқинларини келтириб чиқарди. Оқибатда 46 киши вафот этди, 23 киши бедарак йўқолгани айтилмоқда. Кучли ёмғир ва шиддатли шамоллар келгуси 12 соат ичида яна тошқинларни келтириб чиқариши кутилмоқда.

Расмийларнинг айтишича, ҳалок бўлганларнинг аксарияти шарқий ва марказий ҳудудларга ёғган ёмғир сабаб юзага келган кўчкилар оқибатида вафот этган.

Мамлакат бўйлаб қарийб 44 минг киши зарар кўрган. Мактаблар ва поезд қатновлари бекор қилинди, ҳарбийлар ва полиция эвакуацияни мувофиқлаштирди.

Ҳаво кучлари ОАВга тақдим этган кадрларга кўра, томларда қолиб кетган кўплаб оилалар вертолёт орқали хавфсиз жойга кўчирилган.

20 мингдан ортиқ полиция ва ҳарбий хизматчи эвакуация чораларини кучайтирди. Циклон Шри-Ланка устидан ўтиб, жанубий Ҳиндистонга қараб силжишда давом этмоқда.