Ўзбекистон ва Саудия Арабистони ўрта тиббиёт ходимларини ишга жойлаштириш бўйича келишув имзолади

Миграция агентлиги маълумотига кўра, Ўзбекистон ва Саудия Арабистони ўртасида меҳнат миграцияси йўналишида муҳим янги келишув имзоланди. Ҳужжат Миграция агентлиги ҳамда Саудиянинг Health Resources Company (HRCO) компанияси ўртасида тузилган.

Икки томонлама манфаатли ушбу келишувнинг асосий мақсади — Саудия Арабистонида ўрта тиббиёт ходими сифатида ишлаш истагида бўлган юртдошларни ушбу мамлакатга қонуний, хавфсиз ва шаффоф тартибда ишга жойлаштиришдан иборат.

Маълумот ўрнида, HRCO (Health Resources Company) Саудия Арабистони соғлиқни сақлаш тизимини марказлашган тарзда бошқариш бўйича амалга оширилаётган кенг қамровли ислоҳотлар доирасида ташкил этилган муҳим тузилма ҳисобланади. Компания инсон ресурслари (HR) операторы сифатида мамлакатдаги барча давлат тиббиёт муассасалари учун ягона кадрлар сиёсатини ишлаб чиқиш ва бошқариш билан шуғулланади.

Миграция агентлиги эълонларига кўра, Саудияда ишлаш истагини билдириб ариза қолдирган 887 нафар номзод ўрта тиббиёт ходимлари орасида саралаш ишлари олиб борилган ва суҳбатга тайёр деб баҳоланганлар учун иш берувчи томон вакиллари иштирокидаги танловлар бошланган.

Юртдошларга қулайлик яратиш мақсадида бундай суҳбатлар жорий йил 3–4 декабр кунлари Андижон шаҳрида ҳам ўтказилиши белгиланган.