Тошкентда қурилиш компанияси 51 туп дарахтни рухсатсиз кесиб ташлагани аниқланди. Куннинг муҳим янгиликлари билан таништирамиз.
5 миллион тоннадан зиёд пахта терилди
2026 йилда деҳқонлар 5 миллион тоннадан зиёд пахта йиғиб олди. Президент Шавкат Мирзиёев деҳқон ва фермерларга йўллаган табригида бу йил фермерлар пахтадан 13–14 триллион сўм соф фойда олиши кутилаётганини билдирди.
Давлат раҳбарининг 4 ноябрдаги табригида ушбу натижа Янги Ўзбекистон тарихидаги рекорд сифатида қайд этилди. Президент уни «пахтачилик соҳасидаги Янги Ўзбекистон мўъжизаси» деб атаб, деҳқонлар, фермерлар, агрономлар, сувчилар, механизаторлар, олимлар ва кластер ходимларига миннатдорлик билдирди.
Таққослаш учун, 2000 йилда мамлакатда 1,4 миллион гектар майдонга чигит экилиб, жами 3 миллион тонна пахта териб олинган. Бу йил қарийб 400 минг гектар ерда ўртача ҳосилдорлик 70 центнерга етган, салкам 70 минг гектарда эса гектаридан 100–110 центнергача ҳосил олинган. Мингга яқин фермер хўжалиги ва кластер ўртача 100 центнерлик ёки ундан юқори натижани қайд этган.
Тошкент кўчаларида буюртма етказувчи роботлар пайдо бўлиши кутилмоқда
Yandex Uzbekistan компанияси 2026 йил охиригача Тошкентдаги Yandex Lavka буюртмаларини тезкор етказиб беришга роботларни жалб қилишни режалаштирмоқда. Бу ҳақда компания раҳбари Иззат Шукуров таҳририятнинг лойиҳага тайёргарлик бўйича сўровига жавобан маълум қилди.
Пилот лойиҳа натижаларига кўра, компания уни босқичма-босқич кенгайтиришни режалаштирмоқда. Жумладан, роботларни Yandex Uzbekistan экотизимининг бошқа сервислари буюртмаларини етказиб беришга жалб қилиш, шунингдек, бу хизматни бошқа компанияларга ҳам таклиф этиш кўзда тутилган.
Фойдаланувчи буюртмани расмийлаштириш вақтида иловада унинг тахминий етиб келиш вақтини кўради. Робот икки километргача бўлган масофага етказиб бериш учун мўлжалланган ва пиёдалар оқими тезлигида ҳаракатланади.
Бокираликни тиклаганлик учун жиноий жавобгарлик белгиланиши рад этилди
