Тошкентда ҳаво ифлосланиши: РМ2,5 миқдори меъёрдан 1,2 марта ошди

Маълум қилинганидек, 2025 йил 3 декабр куни соат 09:00 да атмосфера ҳавоси ифлосланиши мониторинги автоматик станциялари Тошкент шаҳри ҳавосидаги майда дисперсли заррачалар концентрацияси бўйича қуйидаги кўрсаткичларни қайд этди:

🔹 РМ10 заррачалар миқдори – 125 мкг/м³, бу рухсат этилган меъёр (300 мкг/м³)дан ошмаган;
🔹 РМ2,5 майда дисперсли заррачалар миқдори – 70,2 мкг/м³, бу эса рухсат этилган меъёр (60 мкг/м³)дан 1,2 марта юқори.

Таъкидланишича, кўрсаткичларнинг ошишига ҳаво ҳароратининг кескин ўзгариши ҳам таъсир кўрсатган. Ҳарорат кескин ўзгарганда юзага келадиган инверсия жараёни майда заррачаларнинг ҳаво қатламида тўпланишига сабаб бўлади, бу эса атмосфера ҳавосида уларнинг концентрациясини оширади.

Мутахассислар бундай ҳолатларда, айниқса, болалар, кекса ёшдаги фуқаролар ҳамда нафас йўллари ва юрак-қон томир касалликларидан азият чекаётган шахсларга очиқ ҳавода узоқ вақт қолмаслик, имконияти борича ҳимоя ниқобларидан фойдаланиш каби эҳтиёт чораларига амал қилишни тавсия этмоқда.