Нотариусликка талабгорлар учун махсус ўқув курслари тартиби белгиланди

Адлия вазирлиги Нотариусликка талабгорлар учун Юридик кадрларни қайта тайёрлаш ва малакасини ошириш институтида ўқув курсларини ташкил этиш тартиби тўғрисидаги низомни давлат рўйхатидан ўтказди. Ҳужжат 2026 йил 1 апрелдан кучга киради.

Фото: Sputnik / Максим Блинов

Низомга мувофиқ, нотариусликка талабгорлар Институт билан тузиладиган шартнома асосида 72 соатлик ўқув курсларида ўқитилади.

Ўқув курслари бевосита Институт биносида ёки масофавий таълим шаклида ташкил этилиши мумкин.

Талабгорлар йил давомида электрон тарзда ёки ёзма равишда ўқув курсларига қатнашиш учун ариза топшириш ҳуқуқига эга.

Ўқув жараёни:

ҳар бири 25 нафардан ортиқ бўлмаган тингловчилардан иборат академик гуруҳларда ташкил этилади;
маъруза, семинар ва амалий машғулотлар шаклида ўтказилади;
ҳар бир машғулотнинг давомийлиги 80 дақиқани ташкил этади.

Ўқув курслари якунида:

махсус имтиҳон комиссияси томонидан суҳбат шаклида имтиҳон ўтказилади;
тингловчилар 100 баллик тизим асосида баҳоланади;
камида 56 фоиз балл тўплаган тингловчиларга белгиланган намунадаги сертификат берилади.

Мазкур тартиб нотариусликка даъвогар бўлган юристларни мақсадли тайёрлаш, уларнинг билим ва малакасини баҳолаш жараёнини яхлит ва шаффоф механизм асосида ташкил этишга қаратилган.

Тайёрлаган: Отабек Матназаров

#низом #нотариус