Трамп келаси йил бошида Ғазо Тинчлик кенгаши аъзоларини эълон қилмоқчи

Ғазо Тинчлик кенгашига жаҳон етакчилари орасидан кимлар аъзо бўлиши бўйича эълон келаси йил бошида маълум қилинади. Бу ҳақда АҚШ президенти Доналд Трамп чоршанба куни Оқ уйда бўлиб ўтган тадбир чоғида айтди.

АҚШ етакчисига кўра, Ғазо сулҳи доирасида тузилган мазкур кенгашга турли мамлакатлар етакчилари қўшилишни хоҳламоқда.

«Қироллар, президентлар, бош вазирлар — ҳаммаси Тинчлик кенгашида бўлишни истаяпти», деди Трамп. «Бу тарихдаги энг афсонавий кенгашлардан бири бўлади. Ҳамма унда бўлишни истаяпти». У бу эълон янги йил бошида маълум қилинишини таъкидлади.

.@POTUS says he'll name the Gaza Board of Peace "early next year": "It'll be one of the most legendary boards ever... Basically, it'll be the heads of the most important countries. They all want to be on it." pic.twitter.com/j74cqS6xou

— Rapid Response 47 (@RapidResponse47) December 10, 2025

БМТ Хавфсизлик кенгаши 17 ноябрда қабул қилган резолюция Тинчлик кенгашига ҳамда унга аъзо давлатларга Халқаро Барқарорлаштириш кучларини тузиш ва Ғазога жойлаштиришга рухсат беради.

АҚШ томонидан лойиҳалаштирилган ушбу резолюцияда Тинчлик кенгаши ўтиш даври маъмурияти сифатида тасвирланади. Кенгаш Ғазони қайта тиклашга доир молиялаштириш ишларини мувофиқлаштиради ва ривожланишнинг умумий йўналишини белгилаб беради.

Резолюцияда айтилишича, Тинчлик кенгаши «Фаластин маъмурияти ўзининг ислоҳот дастурини етарли даражада якунлаб, Ғазони хавфсиз ва самарали тарзда қайта назоратига ола оладиган вақтга қадар» фаолият юритади.

Айни вақтда, халқаро воситачилари кўмаги билан Исроил ва Ҳамас ўртасидаги мўрт сулҳ амал қилмоқда. Ҳамас Ғазода қолаётган сўнгги жасадни топиб қайтарганидан кейин сулҳнинг 2-босқичи бошланиши кутилмоқда.