Доналд Трамп таъбири билан айтганда, грин-картадан фарқ қилмайдиган «Trump Gold Card»га мурожаат қилишнинг ўзи – 15 минг доллар. Текширувдан ўтганлар 1 миллион доллар тўлаб, АҚШда қонуний мақом, кейинчалик фуқаролик олиши мумкин. Картанинг корпоратив версияси эса икки баравар қиммат.
10 декабрь куни АҚШ президенти Доналд Трамп узоқ вақтдан бери ваъда қилиб келган «Trump Gold Card» – «Олтин карта» виза дастурини расман ишга туширди. Ушбу карта 1 миллион доллар тўлаган шахсларга ва ҳар бир чет эллик ходим учун 2 миллион доллар тўлаган корпорацияларга АҚШда қонуний мақом, кейинчалик фуқаролик олиш йўлини таклиф қилади.
Доналд Трампнинг фикрича, ушбу янги виза – АҚШга энг яхши истеъдодларни жалб қилиш, шу билан бирга федерал ғазнага даромад келтиради. У бир неча ойдан бери олтин карта дастурини тарғиб қилиб келмоқда. Ҳатто бир пайтлар ҳар бир карта 5 миллион долларга тушишини айтган эди. Кейинроқ бу нархларни 1 миллион долларга туширди.
The Associated Press’нинг АҚШ расмийларига таяниб ёзишича, дастур доирасида тушадиган барча маблағлар «АҚШ ҳукуматига боради» ва Молия вазирлиги бошқарадиган ҳисобга миллиардлаб доллар оқиб келиши кутилмоқда. Трампнинг айтишича, янги дастур аслида яшил карта (green card) бўлиб, амалда доимий яшаш ҳуқуқини ва кейинчалик фуқаролик олиш имконини беради.
«Бу, асосан, Green card, лекин анча яхшироқ. Анча кучлироқ ва қудратлироқ йўл», деди Трамп Оқ уйда журналистларга.
Яна 15 минг долларлик тўлов
Айни вақтда картага ариза бериш учун АҚШ ҳукумати Trumpcard.gov махсус сайтини ишга туширди. Сайтга картанинг тасвирини ҳам жойлаштирди — унда президент Трампнинг портрети, орқа фонда АҚШ байроғи ва «Trump Gold Card» ёзуви остида унинг имзоси акс этган.
Сайтга кўра, карта учун мурожаат қилишга аризачилар қайтарилмайдиган 15 минг долларлик қайта ишлаш (processing) тўловини тўлаши керак.
