Ҳиндистон нефт компанияси РФ нефтини харид қилишни қайта тиклади

Bloomberg ёзишича, хусусий Reliance Industries компанияси АҚШ санкцияларига қарамай, санкция остида бўлмаган етказиб берувчилардан Россия нефтини арзонлаштирилган нархларда сотиб олмоқда.

Фото: Егор Алеев/ ТАСС

Ҳиндистоннинг энг йирик хусусий нефтни қайта ишлаш компанияси — Reliance Industries Россиянинг асосий корхоналарига қарши амал қилиб турган АҚШ санкцияларига қарамасдан, Россия нефтини харид қилишни қайта тиклади. Бу ҳақда Bloomberg агентлиги 24 декабр, чоршанба куни хабар берди.

Агентлик манбаларига кўра, Reliance Industries Россия нефтини санкция остида бўлмаган етказиб берувчилардан чегирма нархида сотиб оляпти ва уни Гужаратдаги ўз нефтни қайта ишлаш заводига йўналтиряпти. Қуввати суткасига 660 000 баррел бўлган ушбу НҚИЗ маҳаллий истеъмолчиларни маҳсулот билан таъминлайди.

Bloomberg манбалари таъкидлашича, Россия нефтини ташиш учун Reliance Industries “РусЭкспорт” компанияси билан Aframax синфидаги танкерлардан фойдаланиш бўйича шартнома тузган.

Агентлик қайд этишича, ушбу схема қўлланиши эҳтимол, Ҳиндистоннинг Россия нефтини харид қилишидаги пасайишни камайтиради: расмийлар сўзларига кўра, бу ойда харидлар ярмидан ҳам кўпроққа қисқариши мумкин.

АҚШ 22 октябр куни Россияга қарши янги санкциялар жорий қилди. Бу қадам Москва Украинада бошлаган урушни тугатиш бўйича “тинчлик жараёнига Россия томонидан жиддий қизиқиш йўқлиги” билан изоҳланди. “Қора рўйхат”га Россиянинг икки йирик нефть компанияси — “Роснефть” ва “Лукойл”, шунингдек, Россия ҳудудида жойлашган уларнинг шуъба корхоналари киритилди. Қоидабузарлик учун “АҚШ фуқаролари ва хорижий фуқароларга нисбатан фуқаролик-ҳуқуқий ёки жиноий санкциялар қўлланиши” назарда тутилган.

Октябр ойида Reuters агентлиги Reliance Industries АҚШ санкцияларини бузмаслик учун Россия нефтини импорт қилишни қисқартириш ёки тўлиқ тўхтатишни режалаштираётгани ҳақида хабар берган эди.