Сўнгги йилларда Ўзбекистон ишлаб чиқарувчилари учун Европа Иттифоқи ва АҚШ бозорларига чиқиш стратегик аҳамият касб этмоқда. Бу йўлда асосий талаблардан бири — халқаро стандартлар асосида сертификатлаш ва мустақил инспекция ҳисобланади. 2021-йилда «Control Union Quality» МЧЖ шу эҳтиёжни таъминлаш мақсадида ташкил этилган эди.
Ушбу корхона Ўзбекистон–Нидерландлар қўшма корхонаси бўлиб, қишлок хўжалиги, озиқ-овқат ва тўқимачилик корхоналари учун халқаро инспекция ва сертификатлаш хизматларини кўрсатади. Компаниянинг асосий мақсади — маҳаллий ишлаб чиқарувчиларга халқаро бозорларга чиқишда кўмаклашиш ва уларнинг маҳсулотларига бўлган ишончни ошириш. Чунки жаҳон бозорида қишлоқ хўжалиги маҳсулотларини сотиш учун озиқ-овқат хавфсизлиги ва органик келиб чиқишни тасдиқловчи халқаро сертификатлар талаб этилади.
Control Union қуйидаги асосий сертификатлар бўйича хизмат кўрсатади:
- Organic EU (EU Reg. 2018/848),
- USDA NOP,
- GLOBALG.A.P. Integrated Farm Assurance
Органик маҳсулотлар анъанавий маҳсулотларга нисбатан қимматроқ нархда сотилишини яхши биламиз. Шу билан бирга, мазкур халқаро сертификат маҳсулот хавфсизлигини тасдиқлайди. Унинг тайёрланиш жараёни экологик меъёрларга риоя этилишини кўрсатади. Бу мувофиқлик эса ўша компания имиджини ва рақобатбардошлигини ошириб, экспорт ҳажмини кенгайтиришга хизмат қилади.
Компаниянинг мижозлари орасида нуфузли «Global Export Company» МЧЖ, «Baraka Meva Sanoat Servis» МЧЖ, «New Way Industries» МЧЖ каби корхоналарни кўриш мумкин.
Тўқимачилик соҳасида илк ва ягона тажриба
Тўқимачилик саноати дунёда нефт-газ тармоғидан кейин иккинчи йирик ифлослантирувчи соҳа ҳисобланади. Шу боис, халқаро бозорда экологик ва ижтимоий талаблар кескин кучаймоқда. Control Union Ўзбекистонда GOTS, OCS, GRS, RCS, FSC, RWS, Better Cotton (BCI), regenagri® каби халқаро тўқимачилик стандартлари бўйича сертификатлашни амалга ошираётган биринчи ва ягона компания ҳисобланади.
