DW хабарига кўра, АҚШ Олий суди 1 октябрга ўтар кечаси прокуратуранинг шошилинч илтимосномасини қаноатлантириб, ҳукмни ижро этишга йўл очган.
Пайкни ўлимга олиб келувчи инъекция орқали қатл этиш 30 сентябр куни маҳаллий вақт билан соат 18:00 га белгиланган эди. Бироқ АҚШ федерал апелляция суди барча далилларни кўриб чиқиш учун ҳукм ижросини қисқа муддатга тўхтатган.
Олий суд ушбу қарорни бекор қилганидан кейин Пайкнинг адвокатларидан бири AFP агентлигига қатл «яқин вақт ичида» амалга оширилишини билдирган.
1995 йилда 18 ёшли Криста Пайк ва унинг шериги Тадарил Шипп Пайк билан бирга ўқиган 19 ёшли Коллин Слеммерни ўлдирган. Бир йил ўтиб, Пайк қасддан одам ўлдиришда айбдор деб топилиб, ўлим жазосига ҳукм қилинган.
Жиноят содир этилган пайтда 17 ёшда бўлган Шипп эса муддатидан илгари шартли озодликка чиқиш имконияти билан умрбод қамоқ жазосини олган.
Нашрга кўра, Пайк АҚШнинг замонавий тарихида ўлим жазосига ҳукм қилинган энг ёш аёл бўлган.
Унинг адвокатлари жиноят содир этилган вақтдаги ёши ва руҳий ҳолатини инобатга олиб, афв этишни сўраган. Ҳимоя томонининг айтишича, Пайк йиллар давомида онасининг турмуш ўртоқлари томонидан жинсий зўравонликка учраган, руҳий муаммолар ва биполяр бузилишдан азият чеккан.
Адвокатлар Пайкни қатл қилиш учун тиббий кушеткага боғлаш шароитлари Конституциядаги «шафқатсиз ва ғайриоддий жазо» тақиқига зид эканини ҳам таъкидлаган.
Amnesty International ва Америка фуқаролик эркинликлари иттифоқи — ACLU каби ҳуқуқ ҳимояси ташкилотлари Теннесси губернатори Билл Лини ўлим ҳукмини бошқа жазога алмаштиришга чақирган. Бироқ губернатор 28 сентябр куни афв сўровини рад этган.
Мақолада келтирилган Ўлим жазоси бўйича ахборот маркази маълумотларига кўра, АҚШда 1976 йилдан буён 18 нафар аёл ва 1 663 нафар эркак қатл этилган. Аёлга нисбатан охирги қатл 2023 йил бошида амалга оширилган.
