“Госпиталга бориш учун қўлимда граната портлатдим” – Россия армиясига ёлланган шахс қамалди

Россия армиясига ёлланган андижонлик эркак жиноий жазога тортилди. Kun.uz суд ҳужжати билан танишди.

Суд ҳукмига кўра, 1987 йилда туғилган С.Х. 2025 йил 14 апрел куни ишлаб пул топиш мақсадида Россиянинг Новосибирск шаҳрига борган. У ерда йўлларни таъмирлашга ихтисослашган фирмада ишлай бошлаган. Бироқ Россияда ишлаш ва вақтинча яшаш бўйича тегишли ҳужжатларни расмийлаштирмаган.

2025 йил 1 июн куни С.Х. ва шериги полиция томонидан ушланиб, ҳужжати текширилган. Полиция ҳужжати борлиги учун шеригини қўйиб юборган, С.Х.ни эса олиб қолган.

“Қандайдир ҳужжатга имзо қўйдиришди. Эртаси куни поездда Ростов вилоятига олиб кетишди. У ерда 7 кун давомида ҳарбий тайёргарликдан ўтдик. Сўнг ҳарбий юк машинасида Донецк шаҳрига олиб боришди. 2025 йил 25 июн кунига қадар жангда қатнашаётган Россия фуқаролари учун келтирилган озиқ-овқат маҳсулотларини ташиш билан шуғулландим.

Шундан кейин Луҳанскда қайта ҳарбий тайёргарликдан ўтдик. 22 август кунига қадар бизга бириктирилган ҳудудга Украина аскарлари ўтмаслигини таъминлаб турдик. Бир амаллаб госпиталга бориш режасини туза бошладим. Гранатанинг устки қисмини ажратиб олиб, қўлимда ушлаб турганимда портлади. Чап қўлимнинг кичик бармоғи узилиб кетди. Сўнг қўлимни билак соҳасидан боғлаб, ўша ердаги ҳарбий шифокорга кўриндим. Сўнг мени аввалига Луҳанскдаги, кейин Волгоград шаҳридаги госпиталга жўнатишди”, деган эркак суддаги кўрсатмасида.

С.Х. 2025 йил 6 октябр куни госпиталдан қочиб чиқиб, Москва шаҳрига борган. Сўнгра самолётга чипта олиб, Ўзбекистонга қайтган.

ЖИБ Бўстон туман судининг 2025 йил 4 декабрдаги ҳукми билан С.Х. Жиноят кодексининг 154-моддаси (ёлланиш) 1-қисмида назарда тутилган жиноятларни содир этганликда айбли деб топилган. Унга Жиноят кодексининг 57-моддаси қўлланган ҳолда 3 йил муддатга озодликдан маҳрум қилиш жазоси тайинланган.

Аввалроқ Россия армиясига ёлланиб, Украинага қарши урушда иштирок этган сурхондарёлик йигит 3 йил муддатга озодликдан маҳрум қилинганди.