ГУР Капустин “ўлдирилгани”нинг инсценировкаси видеосини кўрсатди

Украина Мудофаа вазирлиги Бош разведка бошқармаси (ГУР) жума куни, 2 январда “Рус кўнгиллилар корпуси” (РКК) деб аталувчи ҳарбий бўлинма раҳбарларидан бири, ўта ўнг қарашлари билан танилган Денис Капустиннинг “ўлдирилиши” инсценировка қилингани ҳақидаги видеони эълон қилди.

Украина разведкаси даъво қилишича, Капустиннинг “ҳаётини сақлаб қолиш” ва “душман агентура тармоғини фош этиш” мақсадида дронлар орқали видеоёзувлар тайёрланган. ГУР хабарида: “Биринчи учувчисиз аппарат Капустин бўлган микроавтобусга урилган, иккинчиси эса ‘зарба оқибатлари’ни — ёнган автомобилни тасвирга олган”, — дейилади.

ГУРнинг таъкидлашича, ушбу видеолар “Россия махсус хизматларидаги буюртмачиларга” юборилган, шундан кейин улар Капустинни ўлдириш учун мукофот сифатида ярим миллион доллар пул топширган.

27 декабр куни РКК Telegram-канали 41 ёшли Капустин Украина Запорижжя вилоятида FPV-дрон ҳужуми оқибатида ҳалок бўлгани ҳақида маълумот тарқатган эди. 1 январда эса ГУР “Капустин ўлдирилиши” Украина махсус хизматлари томонидан инсценировка қилинганини, “бир ойдан ортиқ давом этган Украина Мудофаа вазирлиги ГУРнинг комплекс махсус операцияси натижасида” унинг ҳаёти сақлаб қолинганини билдирди.

Украина разведкаси баёнотидан кейин Россия ИИВ Капустинни яна бир бор қидирувга эълон қилди. РКК ёзишича, бу ҳақдаги белги РФ ИИВ сайтидаги қидирувлар карточкасида пайдо бўлган.

Капустин Москвада туғилган, болалигида эса ота-онаси билан Германияга кўчиб кетган, Кёлнда яшаган. У футбол фанатлари муҳитида танилган, Россия, Украина ва Европада аралаш яккакураш (ММА) мусобақаларини ташкил қилган, шунингдек White Rex спорт экипировкаси брендини яратган. Бу брендда нацистик рамзларга ишора қилувчи белгилар “ниқобланган” ҳолда акс этган кийимлар ҳам бўлгани айтилади (масалан, неонацистик “Қора қуёш” рамзи ёки 14/88 сонлари туширилган футболкалар).

2019 йил май ойида Германия ҳокимияти Капустиннинг Германияда доимий яшаш ҳуқуқини бекор қилган — у Кёлндаги манзилидан рўйхатдан чиқарилган, чунки у ерда анча вақтдан бери яшамагани айтилган. Шунингдек, “эркин демократик тузум асосларини бузишга интилиш” сабабли унга Шенген ҳудудидаги барча мамлакатларга кириш тақиқланган.

Россиянинг Украинага кенг кўламли ҳужуми бошланган пайтда Денис Капустин Украинада яшаган ва 2022 йилда айнан ўша ерда РККни тузган. Унинг айтишича, бўлинма таркибига “этник руслар” кирган. РКК ўзини Украина томонида жанг қилаётган рус кўнгиллиларининг “ҳарбий-сиёсий ташкилоти” деб атайди. У асосий мақсадлар сифатида Украинанинг 1991 йилги чегараларида ҳудудий яхлитлигини тиклаш ва “РФдаги амалдаги режимни ағдариш”ни кўрсатади.