Трамп Венесуэла вице-президентига шарт қўйди

Трампнинг сўзларига кўра, АҚШ Венесуэла вице-президенти билан бир неча бор мулоқот қилган ва у вазиятни тушунади.

Фото: Reuters

Агар Венесуэла президенти Делси Родригес Вашингтоннинг айтганини қиладиган бўлса, бу мамлакатга Америка ҳарбийлари жойлаштирилмайди. Бу ҳақда АҚШ президенти Доналд Трамп New York Post газетасига берган интервюсида айтди.

Мухбир Трампга Венесуэлада АҚШ қўшинлари жойлаштирилиши мумкинлиги ҳақида савол берганида "Агар вице-президент бизнинг айтганимизни қилса, бунга ҳожат қолмайди", - деб жавоб қайтарди АҚШ раҳбари.

Трампнинг қўшимча қилишича, АҚШ “у билан бир неча марта мулоқотда бўлган ва у вазиятни тушунади”.

Аввалроқ ўтказилган матбуот анжуманида Трамп “Ҳокимият хавфсиз, муносиб ва оқилона тарзда бошқа қўлга ўтгунига қадар АҚШ Венесуэлани бошқариши”ни айтганди.

Тайёрлаган Дилшодбек Асқаров

#Доналд Трамп #Делси Родригес

2026 йил 3 январ куни соат 02:00 - 04:30 оралиғида АҚШ кучлари Венесуэла ҳудудида махсус амалиёт ўтказиб, мамлакат президенти Николас Мадуро ва унинг рафиқасини ўғирлаб кетди.