Венесуэланинг вақтинча раҳбари АҚШга ҳамкорликни таклиф қилди

Венесуэланинг вақтинча президенти Делси Родригес билдиришича, Каракас қўшнилар билан тинч-тотув яшаш тамойилига содиқ, ташқи таҳдидларсиз ҳаёт кечиришга интилади, ҳурмат ва халқаро ҳамкорлик муҳитида яшашни хоҳлайди. Сиёсатчи якшанба, 4 январ куни Instagram’даги саҳифасига жойлаштирилган очиқ мактубида АҚШ ҳукуматини ҳамкорликка чақирди.

Родригеснинг айтишича, Каракас “АҚШ ва Венесуэла ўртасида”, шунингдек минтақанинг бошқа давлатлари билан “мувозанатли ва ўзаро ҳурматга асосланган халқаро муносабатларни ривожлантириш”га “биринчи даражали аҳамият” беради. “Биз АҚШ ҳукуматини халқаро ҳуқуқ доирасида, жамиятда мустаҳкам бирга яшашни (ҳамжиҳатликни) кучайтириш учун ўзаро ривожланишга йўналтирилган дастур доирасида ҳамкорликка таклиф қиламиз”, — деб ёзди Родригес.

Сиёсатчи АҚШ президенти Доналд Трампга бевосита мурожаат ҳам қилди. У икки халқ ва минтақа “уруш эмас, тинчлик ва мулоқотга лойиқ” эканини қайд этди. Родригеснинг сўзларига кўра, бу — аввалроқ ҳарбий операция вақтида рафиқаси билан бирга қўлга олиниб, АҚШга олиб кетилган Николас Мадуронинг ҳам асосий позицияси бўлган.

Шу куннинг ўзида Доналд Трамп Делси Родригес АҚШ ҳокимияти билан ҳамкорлик қилмаса, “юқори нарх тўлайди”, деб айтган эди. “Эҳтимол, Мадуродан ҳам каттароқ”, — дея АҚШ президентининг сўзларини келтирган The Atlantic нашри.

Бундан олдин, Николас Мадуро ва унинг рафиқаси қўлга олинганига бағишланган матбуот анжуманида Трамп Венесуэлада вақтинча бошқарувни унинг маъмурияти амалга оширишини эълон қилди. Bloomberg маълумотига кўра, бу жараёнда асосий ролни АҚШ давлат котиби Марко Рубио ўз зиммасига олиши керак. Трамп АҚШнинг мамлакатдаги вақтинча бошқаруви ҳокимиятнинг “муносиб” (тўғри тартибдаги) ўтишига қадар амал қилишини айтди.

Родригес эса, ўз навбатида, мамлакатда форс-мажор ҳолатлар туфайли суд қарори билан Венесуэланинг вақтинча президенти этиб тайинланган. У Венесуэланинг легитим президенти Николас Мадуро бўлиб қолишини таъкидлади. ОАВ эса Мадуро лавозимидан расман четлатилмаганини қайд этади.

Associated Press агентлиги ёзишича, АҚШ давлат котиби Марко Рубио кейинроқ Трампнинг Венесуэлани “бошқариш” ҳақидаги баёнотларини юмшатишга уринган. У мамлакатдаги ички жараёнларни назорат қилишга уриниш ҳақида гап кетмаётганини айтган. Рубио сўзларига кўра, АҚШ фақат Трамп аввалроқ Венесуэлага нисбатан жорий этган “нефт карантини”ни қўллаб-қувватлашда давом этади, айнан шу нарса мамлакатдаги сиёсий ўзгаришларни илгари суриш учун босим дастаги бўлиши керак.

“Президент (Трамп — таҳр.) бу ҳақда гапирганда назарда тутаётган ‘назорат’ айнан шу, — деди Давлат департаменти раҳбари CBS телеканалидаги Face the Nation дастури эфирида. — Биз бу карантинни давом эттирамиз ва ўзгаришлар фақат нефт саноати халқ манфаати йўлида бошқарилишида эмас, балки улар (Венесуэла ҳокимияти — таҳр.) наркотик етказиб беришни тўхтатишида ҳам бўлишини кутамиз”.

Каракасга босим ўтказиш воситаси сифатида “нефт карантини” ҳақида АҚШ президенти декабр ўртасида маълум қилган эди. Вашингтонга кўра, нефт экспортидан келадиган даромадларсиз Каракасни бир неча ҳафта ичида иқтисодий фалокат кутади.