«Telsartan H» дори воситасининг айрим партияси муомаладан қайтариб олинади

Ҳиндистоннинг Dr. Reddy's Laboratories компаниясига тегишли «Telsartan H» дори воситасининг айрим партияси муомаладан қайтариб олинади. Бу ҳақда ССВ ҳузуридаги Фармацевтика маҳсулотлари хавфсизлиги маркази хабар берди. Ушбу дори юқори қон босимини (гипертония) даволаш учун комбинацияланган препарат ҳисобланади.

Қайд қилинишича, Dr. Reddy's Laboratories компанияси томонидан ўтказилган сифат назорати ва барқарорлик синовлари натижаларига кўра, «Telsartan H 80 mg/12,5 mg» дори воситасининг C2501976 сериясида фаол модда — гидрохлоротиазид миқдорининг белгиланган меъёрлардан ошгани аниқланган. Мазкур ҳолат дори воситасининг сифат кўрсаткичларига оид номувофиқлик сифатида баҳоланган. Компаниянинг Ўзбекистондаги ваколатхонаси Фармацевтика маҳсулотлари хавфсизлиги марказини бу ҳақда хабардор қилган.

Таъкидланишича, Ўзбекистон ҳудудида муомалага киритилган C2501977 серияси бўйича фаол модда миқдорига оид бундай номувофиқлик қайд этилмаган.

«Бироқ ушбу серия номувофиқлик аниқланган серия билан бир хил ишлаб чиқариш лотига мансуб бўлган фаол моддадан ишлаб чиқарилгани сабабли, дори воситалари муомаласи хавфсизлигини таъминлаш ҳамда эҳтимолий хавфларнинг олдини олиш мақсадида, профилактик чоралар доирасида бозордан қайтариб олинмоқда», дейилади хабарда.

Фармацевтика маҳсулотлари хавфсизлиги маркази C2501977 сериядаги «Telsartan H 80 mg/12,5 mg» дорисини сотиб олган фуқаролардан уни истеъмол қилмасликни, зарурат туғилганда шифокор билан маслаҳатлашган ҳолда муқобил дори воситасини танлашни сўраган.