АҚШ 66 та халқаро ташкилотдан чиқмоқда

АҚШ президенти Доналд Трамп меморандум имзолади, унга кўра, АҚШ 66 та халқаро ташкилотдаги аъзолигини тўхтатади. Бу ҳақда Оқ уйнинг X’даги микроблогида 7 январ, чоршанба куни маълум қилинди.

Қайд этилишича, АҚШ чиқадиган ташкилотлардан 31 таси БМТ шафелигида, 35 таси эса ушбу бутунжаҳон ташкилотидан ташқарида фаолият юритади. Оқ уй маълумотида айтилганидек, уларнинг барчаси “энди АҚШ манфаатларига хизмат қилмайди”.

Бу ташкилотларнинг тўлиқ рўйхати Оқ уй сайтида келтирилган. Унда, жумладан, қуйидагилар бор:

• Украина Илмий-технологик маркази (УИТМ) — оммавий қирғин қуролларининг тарқалишини олдини олишга кўмаклашиш мақсадида ташкил этилган;
• Венеция комиссияси;
• БМТ бош котибининг болаларга нисбатан зўравонлик масаласи бўйича махсус вакили офиси;
• БМТ Демократия жамғармаси ва бошқалар.

Шу билан бирга, АҚШ давлат котиби Марко Рубионинг ушбу мавзуга оид баёнотида айтилишича, Доналд Трамп маъмурияти мамлакат аъзолиги тўхтатилаётган ташкилотларни “исрофгарчиликка йўл қўядиган, самарасиз, зарарли”, “ёмон бошқариладиган”, “такрорланувчи (ортиқча)” ёки “бизнинг (АҚШнинг — таҳр.) давлат суверенитетимизга, эркинликларимизга ва умумий фаровонлигимизга таҳдид солувчи” деб баҳолаган.