Балиқчилик лойиҳаларига гаровсиз 50 млн сўмгача маблағ ажратилади

Қонунчиликка мувофиқ, “Ҳар бир оила – тадбиркор” дастури доирасида аҳоли ва тадбиркорларга балиқчилик лойиҳаларини амалга ошириш учун 50 миллион сўмгача гаровсиз молиявий қўллаб-қувватлаш назарда тутилган.

Фото: Kun.uz

Амалдаги меъёрий ҳужжатларга кўра, мазкур дастурнинг асосий мақсади аҳолини ўзини ўзи банд қилишга рағбатлантириш, кичик тадбиркорликни қўллаб-қувватлаш ҳамда қишлоқ хўжалиги, хусусан балиқчилик соҳасини ривожлантиришдан иборат.

Белгиланган тартибга кўра, балиқчилик йўналишида лойиҳа ишлаб чиққан фуқаролар ва тадбиркорлар гаров қўймасдан 50 миллион сўмгача маблағ олиш имкониятига эга. Ушбу қўллаб-қувватлаш янги хўжаликлар ташкил этиш, мавжуд балиқчилик фаолиятини кенгайтириш, инфратузилмани яхшилаш ва иш ўринларини кўпайтиришга хизмат қилади.

Бундай молиявий кўмак аҳолининг даромад манбаларини диверсификация қилиш, озиқ-овқат хавфсизлигини таъминлаш ва ички бозорда балиқ маҳсулотлари ҳажмини оширишда муҳим аҳамият касб этади.

Маълумот ўрнида, мазкур тартиб билан Lex.uz ҳуқуқий ахборот портали орқали батафсил танишиш мумкин.