Президент Шавкат Мирзиёев Тошкент шаҳрини ижтимоий-иқтисодий ривожлантириш, инвестиция ва бандликни ошириш, маҳаллаларда замонавий инфратузилма яратиш масалалари бўйича ўтказилган йиғилишда тадбиркорлик учун хавфсизлик масаласи муҳим эканига эътибор қаратилди.
Агар ҳокимият тартибни таъминлай олмаса, фақат иқтисодий йўналишдаги ишларнинг ўзи етарли эмаслиги қайд этилган.
Президент тинчлик ва осойишталикни сақлаш учун ҳуқуқни муҳофаза қилувчи органлар янада жадал ишлаши кераклигини таъкидлаб, ички ишлар вазири Азиз Тошпўлатовга жиноятчиликни жиловлаш бўйича кўпроқ ишлаш вазифасини қўйган.
«Жиноятни жиловламагунимизча, ишнинг баракаси бўлмайди, тадбиркор келмайди. Мана шуни билинглар.
Ҳар бир тадбиркор, компания олдин Ўзбекистоннинг харитасини билади, лекин жиноятини жиловланганми, йўқми... ички ишлар вазири мана шуни инобатга олиши керак.
Ҳаммаларинг шуни билинглар. Кичкина иш қилмаяпсизлар. Ўйламанглар, вақтинча иш қиламан деб. Битта нарсани билинглар, шукроналар дейишимиз керак бу тинчликка. Лекин икки карра кўп ишлашимиз керак, халқимиз тинч яшаши учун. Тинч, бемалол уйида, эмин-эркин, қўрқмасдан, ҳеч кимдан.
Бирорта ғўдайган бойвачча пайдо бўлса, бирортангни кечирмайман. Мана шуни билгин ҳамманг. Давлат бўлиши керак. Ана шунда бизда бирдамлик бўлади, ҳамжиҳатлик бўлади, одамлар бизга ишонади», –деган Шавкат Мирзиёев «Ўзбекистон 24» телеканали сюжетида.
Шунингдек, ҳозирги шароитда ҳар бир туман ва маҳалла имкониятларидан тўлиқроқ фойдаланиш, инвестицияларни, қўшилган қийматни ва юқори даромадли иш ўринлари сонини ошириш зарурлиги таъкидланган.
«Ҳар бир туман ҳокими ўз ҳудудида аҳоли ва туристларни магнитдек ўзига тортадиган иккитадан йирик савдо комплекси ёки молл ташкил этиши керак», – деган президент.
Тошкент шаҳри ҳокими Шавкат Умурзоқов ва 12 та туман ҳокимларига 1 октябргача аниқ майдонлар, инвесторлар ва молиялаштириш манбаларини аниқлаш бўйича топшириқ берилган.
